भारतबाट आउने बुलेटबाट सिधै सिलिन्डरमा ग्यास भरेर बेच्ने गिरोह पक्राउ

काठमाडौं – भारतबाट विभिन्न कम्पनीहरुमा ढुवानी हुने खाना पकाउने एलपी ग्यास बीचबाटोमा नै चोरी हुने गरेको तथ्य सार्वजनिक भएको छ।

प्रहरी निरीक्षक प्रकाश थापाको नेतृत्वमा रहेको प्रहरी टोलीले मनहरी गाउँपालिका–६ नयाँबस्तीस्थित एक पसलमा ग्यास बोकेको बुलेट रोकेर घरेलु उपकरण प्रयोग गरी सिलिन्डरमा भर्ने तीन जनालाई पक्राउ गरेको हो।

पक्राउ पर्नेमा ग्याँस चोरी गरेर बेच्ने कार्यमा संलग्न स्थानीय व्यापारी ४३ बर्षीय भरत कार्की, चालकहरु सुनुकुमार र विपिन कुमार रहेका छन्।

भारतबाट आएका दुईवटा एन.एल ०११० १३१ र युपी ७० बीटी ९९९६ नम्बरको ग्यास बुलेट समेत प्रहरीले नियन्त्रणमा लिएको छ ।

इलाका प्रहरी कार्यालय मनहरी मकवानपुरका प्रहरी निरीक्षक थापाले दुईवटा बुलेट, बुलेटका चालक र १८ वटा खाली तथा १३ वटा भरिएका विभिन्न कम्पनीका सिलिन्डरहरु समेत नियन्त्रणमा लिन सफल भएको बताए।

उनले भने, ‘सिलिन्डर भर्नका फलामको पातामा पाइप जोडिएको घरेलु उपकरण निर्माण गरी प्रयोग हुने गरेको अनुसन्धानबाट खुलेको छ। असुरक्षित र जोखिमपूर्ण तरिकाले बुलेटको खतरा लेखिएको बक्स खोलेर घरेलु उपकरण प्रयोगमा ग्यास चोरी हुने गरेको फेला पारेका छौं। एउटा बुलेटबाट ८ देखि १० वटा सिलिन्डर चोरी गर्ने प्रारम्भिक अनुसन्धानबाट खुलेको छ।’

प्रहरी अनुसार अन्य ग्यास बोक्ने बुलेटको गिरोह नै यस्तो कार्यमा संलग्न भएको आशंका गरिएको छ। प्रहरीले पाएको प्रारम्भिक जानकारी अनुसार भारतीय बुलेट चालकहरुले कार्कीको पसलमा नियमित रुपमा ग्यास बिक्री गर्ने गरेका थिए।

उनीहरुले प्रतिसिलिन्डर १ हजार रुपैयाँमा कार्कीलाई बेच्ने र कार्कीले १३ सय रुपैयाँमा उपभोक्तालाई बिक्री गर्ने गरेको खुलेको छ। ती बुलेटहरुले पोखराको शक्ति ग्यास उद्योग र धादिङको क्याप्सन ग्यास उद्योगम ग्यास लैजाँदै थिए।