५ वर्षअघि चोरी भएको मोटरसाइकल झाडीमा भेटिएपछि…


तस्बिरः प्रिमियर इन्सुरेन्सका कर्मचारी भेटिएको मोटरसाइकल लिन महाशाखामा।

काठमाडौं – महानगरीय ट्राफिक प्रहरी महाशाखाले उपत्यकाका विभिन्न स्थानबाट हराएकामध्ये २१ मोटरसाइकल फेला पारी सम्बन्धित धनीलाई जिम्मा लगाएको छ। हस्तान्तरण गरिएका २१ मध्ये १० वटा मोटरसाइकल र ११ वटा स्कुटर रहेका छन्।

जसमा एउटा मोटरसाइकल पाँच वर्षपछि भेटिएको छ। ५ वर्षअघि चोरी भएको बा ७३ प १९५७ नम्बरको मोटरसाइकल मुड्खु जाने सडकको झाडीमा भेटिएको महाशाखाले जनाएको छ।

उक्त मोटरसाइकल मिति २०७२ जेट ३२ मा चोरी भएको थियो। २२० सीसीको पल्सर मोटरसाइकल किनेको एक महिनामै चारी भएको हो। जतिबेला उक्त मोटरसाइकल भीम बहादुर तामाङको थियो।

मोटरसाइकल किनेलगत्तै तामाङले प्रिमियर इन्सुरेन्स गरेका थिए। चोरी भएपछि उनले इन्सुरेन्स क्लेम गरेर आफ्नो पैसा झिकेर लगे पनि उनले ट्राफिक प्रहरीमा निवेदन समेत दिएका थिए।

निवदेन परेपछि ट्राफिक प्रहरीले उक्त मोटरसाइकल खोजी सुरु गर्यो। तर, भेट्टाउन सकिरहेको थिएन्। खोजीकार्य जारी नै राखेपनि पछिल्लो समय ट्राफिक प्रहरीले उक्त मोटरसाइकल खोजीमा त्यति चासो राखेको थिएन्।

अचानक एकदिन उक्त मोटरसाइकल गोगंबु बसपार्क देखियो। गत २६ भदौमा अर्कै मोटरसाइकल खोज्न खटिएको प्रहरीको आँखा २२० सीसीको मोटरसाइकलमा परेको हो। त्यसपछि प्रहरीले उक्त मोटरसाइकलको पिछा गर्यो।

जतिबेला साँझ ७ बजेको समय थियो। सडक जाम र मान्छेको भीडले गर्दा ट्राफिक प्रहरीले उक्त मोटरसाइकल माछापोखरी चोकबाट कता गयो ठम्याउन सकेन्। प्रयास गर्दागर्दै नभेटिएपछि भोलि ट्राफिक प्रहरी उक्त ठाउँमा खटियो।

२७ भदौको बिहान उक्त क्षेत्रको सीसीटीभी फुटेज हेर्न थाल्यो ट्राफिक प्रहरी। सीसीटीभी फुटेजमा हराएको भनिएको शंका लागेको मोटरसाइकल देखियो। उक्त मोटरसाइकल बालाजु बाइपासबाट मुड्खुतिर गएको थियो।

सोही दिन दिउँसो ट्राफिक प्रहरी पुनः मुड्खु एरियातिर परिचालन भयो। तर, पनि मोटरसाइकल भेटिएन। ट्राफिक प्रहरीले हरेश खाएनन्, भोलिपल्ट पनि सोही ठाउँमा सादा पोसाकमा खटिए।

मोटरसाइकल मात्र नभएर चोरी गर्ने व्यक्ति पनि खोजिरहेको थियो ट्राफिक प्रहरी। तर, दुर्भाग्य चोरी गर्ने व्यक्ति भेटिएन, मोटरसाइकल मात्र भेटियो। त्यो पनि मुड्खु जाने सडकमुनी झाडीमा फालेको अवस्थामा।

लामो प्रयासपछि उक्त मोटरसाइकल फेला परेको महाशाखाका प्रहरी बरिष्ठ उपरीक्षक (एसएसपी) जनक भट्टराई बताउँछन्। ‘भेटिएको मोटरसाइकल अहिले इन्सुरेन्सको मान्छेलाई जिम्मा लगाएका छौं,’ उनले भने।
मोटरसाइकल फेला पारेपछि इन्सुरेन्सलाई खबर गरेर मोटरसाइकल लिन बोलाएको एसएसपी भट्टराईले जानकारी दिए। एसएसपी भट्टराईका अनुसार यो मोटरसाइकल जोरपाटीबाट हराएको थियो।

उक्त मोटरसाइकल इन्सुरेन्सका कर्मचारी विष्णुबहादुर खड्काले बुझेका छन्।

चोरीलगत्तै मोटरसाइकलको वास्तविक नम्बर प्लेट परिवर्तन गरेर नक्कली नम्बर प्लेट राखिएको खुलेको छ। सक्कली नम्बरलाई परिवर्तन गरेर बा७६ प ८०२९ नम्बर बनाएर चलाउँदै आएको खुलेको हो।

प्रतिक्रिया