यौन दुर्व्यवहारको घटनामा प्रहरीले कारवाही प्रक्रिया नबढाउँदा बालिकाले गरिन् आत्महत्या

सांकेतिक तस्बिर

काठमाडौं – धनुषामा यौनदुर्व्यवहारको उजुरी गर्दा पनि सुनुवाई नभएपछि एक बालिकाले विष सेवन गरेर आत्महत्या गरेकी छन्। धनुषाको जनकनन्दनी गाउँपालिका–४ बस्ने १२ वर्षीया ममता कामतले आत्महत्या गरेकी हुन्।

कामतले न्याय नपाउँदा आवेगमा आएर विषपान गरी आत्महत्या गरेको परिवारको भनाइ छ। जिल्ला प्रहरी कार्यालय धनुषाका अनुसार मृतक बालिकाले १२ असोजमा विष खाएर आत्महत्या गरेकी हुन्।

७ कक्षामा अध्ययनरत कामतमाथि २३ भदौमा ट्युसन पढेर घर फर्किने क्रममा सोही गाउँका तीन युवाले यौन दुर्व्यवहार गरेको आरोपका साथ परिवारले स्थानीय प्रहरी चौकीमा उजुरी दिएको थियो।

दुर्व्यवहारबारे बालिकाले परिवारजनलाई जानकारी गराएपछि परिवारसहित बालिका ईलाका प्रहरी कार्यालय खजुरीमा २४ भदौमा जाहेरी दिएका थिए।

ईलाका प्रहरी कार्यालयमा जाहेरी दिँदा समेत प्रहरीले कारवाही प्रक्रिया नबढाउँदा बालिकाले आत्महत्या रोजेको हुनसक्ने परिवारको आरोप छ।

प्रहरीले गाउँमै घटना मिलाउन भनेपछि जनकनन्दनी गाउँपालिका– ४ का वडाध्यक्षलाई मृतक बालिकाको परिवारले गुनासो समेत गरे। वडा कार्यालयमा २५ भदौमा सो घटनाबारे छलफल भए पनि कुनै निष्कर्ष निस्किएन।

बालिकामाथि दुर्व्यवहार गर्ने पक्षका रामउदगार दासले होहल्ला गरेपछि छलफल कुनै टुंगोमा पुग्न सकेन्। त्यसैले न्यायमा ढिला हुँदा बालिकाले आत्महत्या गरेको हुनसक्ने आशंका छ।

यता ईप्रका खजुरीका प्रहरी निरीक्षक (इन्सपेक्टर) रवि मैनालीले पीडित परिवारले उजुरी दिँदा पीडित बालिकालाई ल्याउन नसकेको कारण दर्ता प्रक्रिया अघि बढ्न नसकेको बताए। उजुरीपछि तीन जनालाई प्रहरी कार्यालयमा बोलाएर समेत सोधपुछ गरेको मैनालीको दावी छ।

तीन युवाले मोबाइल नम्बर लेखिएको एउटा पर्ची ममताको हातमा जबर्जस्ती थमाएको बताइन्छ। मृतक बालिकाको शव प्रादेशिक अस्पताल जनकपुरधाममा पोस्टमार्टमपश्चात राखिएको छ।