डा. भक्तमान श्रेष्ठ अपहरण प्रकरणः फरार अभियुक्त पण्डित पक्राउ

काठमाडौं – प्रहरीले डा. भक्तमान श्रेष्ठको अपहरणमा संलग्न थप एक जनालाई पक्राउ गरेको छ। अपहरणमा संलग्न राजेन्द्र पण्डितलाई प्रहरीको केन्द्रीय अनुसन्धान ब्यूरो (सीआईबी) को टोलीले मंगलबार पक्राउ गरेको हो।

पण्डितलाई उच्च अदालत हेटौंडाका न्यायाधीश तिल प्रसाद श्रेष्ठ र सरिता शर्माको इजलासले ९ वर्ष कैद सजाय र ५० हजार जरिवाना सुनाएको थियो। नुवाकोट स्थायी घर भएका पण्डितलाई सीआईबीको टोलीले नुवाकोट पुगेरै पक्राउ गरेको हो।

लामो समय भारतमा लुकिछिपी बस्दै आएका पण्डित नेपाल आएको थाहा पाएपछि प्रहरीले पण्डितलाई खोजी गरेको थियो। सोही क्रममा नुवाकोटस्थित घरमै बसिरहेको अवस्थामा उनी पक्राउ परेका सीआईबीका डिआईजी धीरजप्रताप सिंहले बताए।

फैसला कार्यान्वयनका लागि पण्डितलाई बुधबार अदालतमा पेस गरिने सीआईबीले जनाएको छ।

सोही अभियोगमा नुवाकोटका बद्रीप्रसाद ढुङ्गाना, महाराजगञ्जका सुनिल श्रेष्ठ, भारतको दार्जिलिङका नवीन क्षेत्री, कानपुरका रोहित पालिवाल अग्रवाल र काठमाडौँका सुब्बा तामाङ पक्राउ परिसकेका छन्।

तर, घटनाका मुख्य अभियुक्त नुवाकोट घर भएका भेषराज पण्डित अहिलेसम्म पक्राउ परेका छैनन्। प्रहरीका अनुसार उनी भारतमा लुकिछिपी बस्दै आएका छन्।

विसं २०६७ जेठ ४ गते राति १० बजे बिरामी उपचार गरेर घर फर्किने क्रममा भरतपुरको हाकिमचोकबाट श्रेष्ठलाई अपहरण गरिएको थियो। अपहरणको १९ दिनपछि तीन किलो ६०० ग्राम सुन भारतको कानपुरमा बुझाएपछि उनी अपहरणमुक्त भएका थिए।

तत्कालीन समयमा बिपी कोइराला मेमोरियल क्यान्सर अस्पतालको कार्यकारी निर्देशक समेत रहेका श्रेष्ठलाई सो अस्पतालको वार्षिक बजेट रु २८ करोड हाराहारी फिरौती रकम माग गरेकोमा पछि तीन किलो ६०० ग्राम सुन दिने सहमति भएको थियो।