काठमाडौंमै ‘बोक्सी’ भन्दै महिलामाथि निर्घात कुटपिट


सांकेतिक तस्बिर

काठमाडौं – काठमाडौंमै बोक्सी भन्दै एक महिलामाथि निर्घात कुटपिट भएको छ। प्रहरीले कुटपिटको आरोपमा श्रीमानसहित चार जनालाई पक्राउ गरेको छ।

काठमाडौंको ठूलो भ¥याङमा झारफुक गरेर बोक्सी झार्ने नाममा महिलालाई चरम यातना दिइएको हो। पक्राउ पर्नेमा पीडित महिलाका श्रीमान्, दीपेन्द्रकुमार थिङ, दशनारायण महर्जन र जनार्दन पाण्डे छन्।

महानगरीय प्रहरी परिसर काठमाडौंका अनुसार भदौ २० गते ललितपुरको लुभू बस्ने ३३ वर्षीया महिलाको पेट दुखेर स्वयम्भू ठूलो भर्‍याङमा झारफुक गराउन जाँदा बोक्सी लागेको भन्दै कुटपिट गरिएको हो।

पेट दुखेपछि महिलाले आफ्ना पति जितेन्द्र तामाङलाई अस्पताल लान आग्रह गरेकी थिइन्। तर, उनले मामा नाता पर्ने दशनारायणसँग मिलेर पत्नीलाई स्वयम्भू ठूलो भर्‍याङस्थित धामी दिपेन्द्र कुमार थिङकहाँ लगेका थिए।

बोक्सी लागेको भनी कुटपिट गरेको जाहेरी महानगरीय प्रहरी परिसर टेकुमा परेपछि श्रीमानसहित चार जनालाई २२ भदौमा पक्राउ गरिएको परिसरका प्रहरी वरिष्ठ उपरीक्षक अशोक सिंहले जानकारी दिए।

साथै उनीहरू चारै जनाको मिलेमतोमा महिलालाई लछारपछार गरी रातभर कुटपिट गर्नुका साथै शौचालयबाट दिशा समेत ल्याएर खुवाएको पीडित महिलाले जाहेरीमा उल्लेख गरेकी छन्।

झारफुक गर्ने थिङकै आग्रहमा महिलाका श्रीमानसहित अरुले पनि ती महिलालाई कुटपिट गरेको प्रहरीले दाबी गरेको छ।उनीहरूले शरीरका विभिन्न अंगहरूमा कुटपिट गरेको आरोप छ।

पीडित महिलाको जाहेरीपछि प्रहरीले उनीहरूलाई पक्राउ गरी थप अनुसन्धान अघि बढाएको जनाएको छ।

प्रतिक्रिया