मुस्लिम आयोग अध्यक्ष समिममियाँको सेटिङमा काठमाडौंको मुटुमा रहेको व्यक्तिको जग्गा कब्जा

काठमाडौं– केही व्यक्तिले काठमाडौंको मुटुमा नै रहेको करिब १५ करोड मुल्य बराबरको जग्गा अनधिकृत रुपमा कब्जा जमाई भाडामा लगाएका छन्।

सुन्धारामा रहेको ६ आना १ पैसा २ दाम क्षेत्रफल रहेको जग्गा अजिममियाँ अन्सारी र परवेज अख्तर अन्सारीले त्यसरी कब्जा जमाएका थिए। अहिले राष्ट्रिय मुस्लिम आयोगका अध्यक्ष समिममियाँ अन्सारी र उनका दाई राज महोम्मद अन्सारीले कब्जा गरेका छन्।

यस प्रकरणमा काठमाडौं महानगरपालिकाका मेयर विद्यासुन्दर शाक्य र प्रमुख प्रशासकीय अधिकृत राजेश्वर ज्ञवालीको पनि सहयोग रहेको बताइएको छ।

शक्ति केन्द्रको आडमा त्यसरी कब्जा भएपछि जग्गाधनीले सम्पत्तिमाथिको अधिकार खोज्दै काठमाडौं महानगरपालिकादेखि जिल्ला प्रशासन कार्यालय र गृह मन्त्रालयसम्म धाउनु परेको छ।

काठमाडौं महानगरपालिकाले जग्गा कब्जा गरी बसेका अजिममियाँ र परवेज अन्सारीका नाममा २० माघ २०७६ मा नै पत्र पठाई खाली गर्न भनेको थियो। महानगरको पत्रमा भनिएको छ,‘१३ माघ ०५९मा नक्सा पास नगरी स्वीकृत समेत नलिई निर्माण गरेका घर स्थानीय स्वायत्त शासन ऐन ०५५ को दफा १६१(५) बमोजिम भत्काई भत्काउन लाग्ने खर्च समेत ऐनबमोजिम प्रतिवादीबाट असुल उपर गर्ने ठहर्छ भनी फैसला भई तह तह हुँदै सर्वोच्च अदालतसम्म पुगेको र अदालतले पनि महानगरको फैसला सदर गरेका कारण आदेशअनुसार गर्न अनुरोध गरिन्छ।’

उक्त पत्रको बोधार्थ काठमाडौं वडा नम्बर २२ को कार्यालयलाई पनि बुझाइएको थियो। तर अहिलेसम्म पनि उक्त जग्गामा निर्माण गरिएका घर टहरा भत्काइएका छैनन्। अजिममियाँ र परवेज अख्तरलाई उक्त घर नभत्काउन र आदेश समेत नमान्नका लागि समिममियाँको आड रहेको थियो। अहिले अजिममियाँ र परवेजबाट समिममियाँ दाजुभाईले उक्त जग्गा कब्जा गरेका छन्।

उच्च अदालत पाटनले १४ वैशाख ०६१ र सर्वोच्च अदालतले ५ पुस ०६१ सालमा नै महानगरको निर्णय सदर गर्दै फैसला सुनाएको थियो। फैसला कार्यान्वयन नभएपछि रत्नकाजी महर्जनलगायतले अदालतमा निवेदन दिएपछि सर्वोच्च अदालतको फैसला कार्यान्वयन निर्देशनालयले २८ साउन ०७७ मा फेरि महानगरपालिकालाई पत्र लेखी ताकेता गरेको थियो।

महानगरपालिकाले जग्गा छाड्ने निर्णय गरेपछि त्यसलाई बदर गर्न भन्दै उपभोग गरिरहेका परवेज अख्तर अन्सारीले भेषराज न्यौपानेलाई प्रतिवादी बनाई निवेदन दिएका थिए। तर, महानगरपालिकाका तत्कालिन प्रमुख तथा कार्यकारी अधिकृत पद्मराज रेग्मीले उक्त निवेदन नै बदर गरेका थिए।

न्यौपानेले उक्त जग्गा रत्काजीलाई विक्रि गरिसकेका छन्।

पटक–पटक फैसला कार्यान्वयनका लागि ताकेता हुँदा पनि कब्जा गरिएको जग्गाबाट उनीहरू नहट्दा वास्तविक धनी मारमा परेका छन्। तीन पुस्तादेखि बसेको भनी दाबी गरेका उनीहरूलाई हटाई सम्पत्ति उपभोगका लागि वास्तविक धनीले अड्डा अदालत धाइरहँदा शक्ति केन्द्रको आडमा पाएको न्याय पनि उपभोगबाट बञ्चित रहेका छन्।

काठमाडौं महानगरले अहिले निर्णय कार्यान्वयन गर्दा एक मिनेटमा काम हुने भए पनि शाक्य र ज्ञवाली पनि मिलेका कारण रत्काजी न्याय पाउनबाट बञ्चित भएका छन्।