गजुरीमा १० दिनदेखि वेपत्ता युवती मृत भेटिइन्

काठमाडौं – १० दिनदेखि वेपत्ता युवती मृत भेटिएकी छन्। घटना धादिङको गजुरी गाउँपालिकाको हो।

१० दिनदेखि बेपत्ता २० वर्षीया सम्झना रोकाको शव गजुरी–८, पर्वाङस्थित जंगलमा भेटिएको प्रहरीले जनाएको छ।

इलाका प्रहरी कार्यालय गजुरीका प्रहरी नायब उपरीक्षक (डिएसपी) युवराज खड्काले वेपत्ता रोकाको शव भेटिएको पुष्टि गरे।

‘शव सडेको अवस्थामा भेटिएको छ। जाँचका लागि शव उठाइसकेका छौं,’ खड्काले भने, ‘जिल्लामै पोष्टमार्टम गर्ने कि अन्यत्र लैजाने टुंगो लागेको छैन।’

घटनास्थलबाट उनको घर ३ सय मिटरको दूरीमा छ। घटनाबारे थप अनुसन्धान भइरहेको प्रहरीले जनाएको छ।