१३ वर्षपछि चोरी मुद्दाका अभियुक्त पक्राउ

दोलखा – जिल्ला प्रहरी कार्यालय दोलखाले १३ वर्षपछि एक चोरी मुद्दाका अभियुक्तलाई पक्राउ गरेको छ ।

जिल्ला प्रहरी कार्यालयका अनुसार दोलखा जिल्ला घ्याङसुकाठोकर–४ हाल मेलुङ गाउँपालिका–४ का २८ वर्षीय गोपी कटुवाललाई पक्राउ गरिएको हो ।

निज कटुवाललाई जिल्ला अदालत दोलखाले २०६५ सालमा चोरी मुद्दामा ११ वर्ष १ महिना ५ दिन सजाय तोकेको थियो । कटुवालले २०६५ साल वैशाख १६ गते दोलखा जिल्लाको फस्कु गाविस वडा नं. १ चरंगे जंगलमा स्थानीय तुलना बुढाथोकी र कालिका बुढाथोकीको साथमा रहेको नगद तथा गरगहना चोरी गरेको आरोपमा मुद्दा दायर गरिएको थियो ।

साथै जिल्ला प्रहरी कार्यालय दोलखाले चालू आवमा विभिन्न मुद्दामा कैद तथा जरिवाना लागेर फरार रहेका ८४ जना अभियुक्तलाई पक्राउ गरी १२ वर्ष १० महिना १५ दिन कैद र नगद ३ लाख ८६ हजार ५४ रुपैयाँ असुल गरेको पनि जनाएको छ ।