नेपाल प्रहरीका डीआईजी सहकुल थापालाई एआईजीमा बढुवा गर्ने सरकारको निर्णय
कागजपत्र |
काठमाडौं — नेपाल प्रहरीका प्रहरी नायव महानिरीक्षक (डीआईजी) सहकुल थापा एआईजीमा बढुवा भएका छन् ।
नेपाल सरकारको मन्त्रिपरिषद्को बिहीबार बसेको बैठकले बढुवा समितिको सिफारिसअनुसार डीआईजी थापालाई एआईजीमा बढुवा गरेको हो ।
केही दिनअघि मात्र प्रहरीमा एआईजीको एक दरबन्दी थप गरिएको थियो । एआईजीमा बढुवा भएसँगै थापा अर्का एआइजी विश्वराज पोखरेलसँगै प्रहरी महानिरीक्षकको प्रतिस्पर्धामा आएका छन् ।
वर्तमान एआईजी हरिबहादुर पाल, निरजबहादुर शाही र प्रद्युम्न कार्की वर्तमान आईजी शैलेश थापासँगै एकै दिन निवृत्त हुने भएकाले आईजीका लागि यी दुई एआईजीबीच प्रतिस्पर्धा हुने भएको हो ।
त्यस्तै मन्त्रिपरिषद्को बैठकले कृष्णहरि पुस्करलाई सचिवमा बढुवा गर्ने निर्णय गरेको छ ।
बढुवा सिफारिस समितिले बढुवाका लागि तीन वरिष्ठ सहसचिवको नाम पठाउँदा पुस्करको नाम पहिलो नम्बरमा थियो । समितिले पुस्करसँगै खगेन्द्रप्रसाद नेपाल र किरणराज शर्माको नाम सिफारिस गरेको थियो ।
