सुजिता भण्डारी प्रकरणः सुजिताले चलाउने मोबाइल सिमकार्डबिना भेटियो

चितवन – २० असारमा घरबाट करिब ४ किमि उत्तरतर्फको ब्रम्हस्थानी सामुदायिक वनको खोल्सामा गलेको अवस्थामा शव फेला परेकी सुजिता भण्डारीले चलाउने गरेको मोबाइल भेटिएको छ

जिल्ला प्रहरी कार्यालय चितवनका प्रहरी उपरीक्षक (एसपी) ओम अधिकारीले शव भेटिएको घटनास्थल नजिकैबाट सुजिताले चलाउने मोबाइल भेटिएको पुष्टि गरे। उनले भने, ‘शव भेटिएको स्थानभन्दा करिब २० मिटर पर सिमकार्डबिना मोबाइल भेटिएको छ।’

त्यस्तै घटनास्थलमा पतेरोमा हाल्ने विषादीको बट्टा, झोला फेला परेको एसपी अधिकारीले बताए। ‘घटनास्थलमा अन्य प्रमाणहरु खोज्ने काम भइहेको छ’, अधिकारीले भने।

यता सुजिताको मृत्युको कारण पत्ता लगाउन शवलाई एम्बुलेन्समार्फत पोष्टमार्टमको लागि टिचिङ अस्पताल, काठमाडौं पठाइएको चितवन प्रहरीले जनाएको छ। ‘पोष्टमार्टम रिपोर्टपछिमात्रै मृत्युको कारण खुल्नेछ’, एसपी अधिकारीले भने।

घटनाको निष्पक्ष छानविन गर्नुपर्ने मागसहित स्थानीयले घटनास्थलबाट शव राखेर फर्किदै गरेको एम्बुलेन्सलाई करिब ८ घण्टा राप्ती–३ झुरझुरेमा अवरोध गरेका थिए।

गत ११ असारदेखि बेपत्ता सुजिताले सोही दिन दिउँसो १२ बजेतिर दिदीलाई आफू अपहरणमा परेको भन्दै बचाउँन अनुरोध गर्दै मोबाइलमा फोन गरेकी थिइन्।