देशभरका विभिन्न स्थानमा दुर्घटना, ८ जनाको मृत्यु

काठमाडौं — काठमाडौं महानगरपालिका–१४ कलंकी मकालु पेट्रोल पम्प अगाडि पार्किङ गरी राखेको बा.३ ख ७५३० नम्बरको ट्रकलाई बा–५ ख ८८६५ नम्बरको कुखुरा बोक्ने ट्रकले बुधबार साँझ ठक्कर दिँदा बा–५ ख ८८६५ नम्बरको ट्रकमा सवार  नुवाकोट सुन्दरदेवी बस्ने २४ वर्षीय रोशन तामाङ सहित ३ जनाको मृत्यु भएको छ । दुर्घटनामा गम्भीर घाइते भएका उनीहरुको कलंकीस्थित सहिद अस्पतालमा उपचारको क्रममा मृत्यु भएको हो । दुर्घटनामा घाइते भएका १ जनाको सोही अस्पतालमा उपचार भइरहेको छ । दुबै सवारी साधन र चालकलाई प्रहरीले नियन्त्रणमा लिएको छ ।

त्यसैगरी बाँकेको राप्तीसोनारी गाउँपालिका–२ मुगुवा खोलास्थित सडकमा बिग्रेर रोकी राखेको ना.३ ख ६३९ नम्बरको ट्रकमा ना.५५ प ९७५६ नम्बरको मोटरसाइकल बुधबार राति ठक्कर खाँदा मोटरसाइकलमा सवार हाल नाम, थर, वतन नखुलेका  चालक समेत २ जना पुरुषको मृत्यु भएको छ । दुर्घटनामा गम्भीर घाइते उनीहरूको भेरी अस्पताल नेपालगंजमा उपचारको क्रममा मृत्यु भएको हो । ट्रक सहित चालकलाई प्रहरीले नियन्त्रणमा लिएको छ ।

यस्तै रौतहटको परोहा नगरपालिका–६ हुलाकी सडकमा ना.८ ख ४२२० नम्बरको मिनी ट्रकको हुटमा बुधबार दिउँसो बिजुलीको तार अल्झिन गई ४ वटा बिजुलीको पोल भाचिँदा पैदलयात्री सोही ठाउँ बसन्पट्टी बस्ने ७० वर्षीय जठु हजरा पासवानको मृत्यु भएको  छ । पोलले थिचिएर  गम्भीर घाइते भएका उनलाई उपचारको लागि वीरगंजतर्फ लैजाँदै क्रममा  बाटैमै मृत्यु भएको हो । ट्रक र चालकलाई प्रहरीले नियन्त्रणमा लिएको छ ।

यस्तै मकवानपुरको हेटौंडा उपमहानगरपालिका(१५ चुरिया नजिक सडकमा बुधबार दिउँसो बा.४२ प ८४७४ नम्बरको मोटरसाइकल अनियन्त्रित भई करिब २० फिट तल खस्न गई दुर्घटना हुँदा चालक बारा परवानिपुर बस्ने २६ वर्षीय प्रतिक क्षेत्रीको घटनास्थलमै मृत्यु भएको छ ।

त्यसैगरी सिरहाको कल्याणपुर नगरपालिका–६ भोक्राहास्थित सडकमा स.१ त ५७९१ नम्बरको ट्याक्टरले बुधबार साँझ ठक्कर दिँदा सोही ठाउँ बस्ने रामाषिस साहको छोरा ३ वर्षीय आर्यन कुमार साहको मृत्यु भएको छ । बाटोमा खेलिरहेको अवस्थामा ठक्कर दिँदा घाइते भएका उनको फुल कुमारी मेमोरियल अस्पताल कर्जन्हातर्फ लैजाने क्रममा बाटोमै मृत्यु भएको हो । ट्याक्टर र चालकलाई प्रहरीले नियन्त्रणमा लिएको छ ।

यस सम्बन्धमा स्थानीय प्रहरीले थप अनुसन्धान गरिरहेको छ ।