गोली प्रहार गरी घाइते बनाएको घटनामा संलग्न २ जना पक्राउ

कपिलवस्तु – कपिलवस्तु नगरपालिका-३ सडवास्थित सडकमा सोही नगरपालिका-१ बस्ने ३४ वर्षीय दिपक पाण्डे र भारत सिदार्थनगरग्राम चेतरी बजार बस्ने २६ वर्षीय ईयाज अख्तर मुसलमानलाई गोली प्रहार गरी घाइते बनाएको घटनामा २ जनालाई प्रहरीले पक्राउ गरेको छ ।

पक्राउ पर्नेहरुमा कपिलवस्तु नगरपालिका-१ बस्ने ३९ वर्षीय ओम प्रकाश यादव र सोही नगरपालिका-२ बस्ने ३३ वर्षीय साकिर अलि पाखिया रहेका छन् ।

लु.९ प ८५२१ नम्बरको मोटरसाइकलमा जर्लैया खोलाबाट तौलिहवातर्फ जाँदै गरेका दिपक र ईयाज बुधबार राति गोली प्रहारबाट घाइते भएको भन्ने खबर प्राप्त हुनासाथ जिल्ला प्रहरी कार्यालयबाट खटिएको प्रहरीले घाइतेलाई उपचारको लागि अस्पताल लगेको थियो । घाइतेमध्ये दिपकको भैरहवा मेडिकल कलेजमा उपचार भइरहेको छ भने ईयाज उपचार पश्चात डिस्चार्ज भएका छन् ।

घटनाको थप अनुसन्धानको क्रममा दिपकसँगको व्यक्तिगत रिसिबिका कारण उनको हत्या गर्ने योजना बनाई लु.१६ प ३४९७ नम्बरमा सवार ओम प्रकाश र साकिर अलिले उनीहरुलाई गोली प्रहार गरी फरार भएको खुल्न आएको छ ।

उनीहरुबाट उक्त नम्बरको मोटरसाइकल, २ थान मोबाइल, १ थान खोका र १ थान जंगी राउण्ड बरामद भएको छ । यस सम्बन्धमा थप अनुसन्धान भइरहेको जिल्ला प्रहरी कार्यालय कपिलवस्तुले जनाएको छ ।