काठमाडौंमा कोकिन र ट्रामाडोलसहित ८ जना नियन्त्रणमा
कागजपत्र |
काठमाडौं- लागुऔषध कोकिनसहित चार जनालाई प्रहरीले पक्राउ गरेको छ ।
पक्राउ पर्नेहरूमा गोरखाको पालुङटार नगरपालिका–९ का २७ वर्षीय सुनिल लामा, झापाको मेचीनगर नगरपालिका–९ का ३१ वर्षीय विवेक गौतम, २७ वर्षीय भारतीय नागरिक हर्षित डाँगी र ३९ वर्षीय भारतीय नागरिक मानिक गुलाटी रहेका छन् ।
लागुऔषध नियन्त्रण ब्युरोको टोलीले उनीहरूलाई पक्राउ गरेको हो । पक्राउ परेकाहरूसँग ३३ ग्राम कोकिन बरामद गरिएको ब्युरोका एसएसपी कृष्ण कोइरालाले जानकारी दिए ।
यसैगरी ब्युरोले औषधिजन्य लागुऔषधसहित थप चार जनालाई पनि पक्राउ गरेको छ । पक्राउ पर्नेहरूमा नुवाकोटका २८ वर्षीय अनिल तामाङ, काभ्रेका २२ वर्षीय प्रदीप थापा मगर, नुवाकोटका २३ वर्षीय सरोज राई र मनाङका २६ वर्षीय सुमन गुरुङ रहेका छन् ।
उनीहरूबाट ट्रामाडोल १२ हजार ६ सय पिस बरामद गरिएको प्रहरीले जनाएको छ ।
