सर्लाहीमा १८ वर्ष नपुगी नियुक्ति दिँदा सचिवसहित दुई जनाविरूद्ध भ्रष्टाचार मुद्दा दर्ता

काठमाडौं-  अख्तियार दुरूपयोग अनुसन्धान आयोगले १८ वर्ष नपुगी बिना दरबन्दी गाउँपालिका (गाविस)मा नियुक्ति दिएको आरोपमा सचिवसहित दुई जनाविरूद्ध सोमबार भ्रष्टाचार मुद्दा दर्ता गरेको छ।

सर्लाहीको तत्कालीन हरिपूर्व गाविस (अहिलेको हरिपूर्वा नगरपालिका) सचिव रामप्रकाश सिंह दनुवारले २०६४ सालमा अरूणकुमार यादवलाई १८ वर्ष नपुगी स्थायी नियुक्ति दिएको आरोपमा मुद्दा दर्ता भएको अख्तियारका प्रवक्ता सुरेश न्यौपानेले जानकारी दिए।

अख्तियारका अनुसार, अरूणकुमार यादव २०४७ असोज ५ गते जन्मिएका थिए र २०६४ सालमा मात्र १७ वर्षको उमेरमा पुगेका थिए। तर सचिव रामप्रकाशले नक्कली कागजात बनाएर उनलाई स्थायी नियुक्ति दिएको देखिएको छ। हाल अरूणकुमार यादव नगरपालिका तहको सहायक पदमा कार्यरत छन्।

प्रवक्ता न्यौपानेले भने, “कानूनी प्रावधान अनुसार कुनै पनि निकायमा नियुक्ति दिन/लिन कम्तीमा १८ वर्षको उमेर पुगेको हुनुपर्ने हुन्छ। गैरकानुनी काम गरी सरकारी हानिनोक्सानी पुर्‍याएको आरोपमा उनीहरू विरुद्ध भ्रष्टाचार मुद्दा दर्ता गरिएको छ।”