दशैंको टिकाको दिन १३ वर्षीया बालिकामाथि सामूहिक बलात्कार
कागजपत्र |
विराटनगर- दशैंको टिकाको दिन सुनसरीको बर्जू गाउँपालिका–६ मा १३ वर्षीया बालिकामाथि सामूहिक बलात्कार भएको घटनामा संलग्न तीन जनालाई प्रहरीले पक्राउ गरेको छ।
प्रहरीका अनुसार पक्राउ पर्नेहरूमा बर्जू गाउँपालिका–६ का २१ वर्षीय बुधनारायण चौधरी, विजय साह र १५ वर्षीय एक किशोर रहेका छन्। उनीहरूलाई गत शनिबार पक्राउ गरिएको हो।
बालिका दशैंको मेला घुम्नका लागि चिमडी बजार गएकी थिइन्। सोही दिन राति करिब १० बजे उनीमाथि जबरजस्ती करणी भएको सूचना इलाका प्रहरी कार्यालय चिमडीमा पुगेपछि प्रहरी टोली घटनास्थल पुगेको थियो।
प्रहरीले बालिकालाई उद्धार गरी तत्काल विराटनगरस्थित नोबेल अस्पताल पुर्याएको र पछि कोशी अस्पतालमा उपचारका लागि स्थानान्तरण गरिएको जनाएको छ।
प्रहरीका अनुसार घटनामा संलग्न अन्य तीन जना अझै फरार छन् र उनीहरूको खोजी तीव्र रूपमा भइरहेको छ।
पक्राउ परेकामाथि थप अनुसन्धानका लागि जिल्ला अदालत सुनसरीबाट पाँच दिनको म्याद लिइएको प्रहरीले जानकारी दिएको छ।
