तीनकुनेमा चलाइएको थियो ११० राउण्ड गोली र २०१ रबर बुलेट [विवरणसहित]

काठमाडौं-  तीनकुनेमा गत चैत १५ गते भएको हिंसात्मक प्रदर्शन नियन्त्रणमा लिन प्रहरीले ८६४ अश्रृग्यासका सेल प्रहार गरेको खुलेको छ । काठमाडौं उपत्यका प्रहरी कार्यालयको प्रतिवेदन अनुसार उक्त प्रर्दशन नियन्त्रणमा लिन एसएलआर र आइएनएसएएस राइफलबाट २४६ राउण्ड गोली चलेको थियो । जसमध्ये जंगी राउण्ड ८१ र ब्ल्याङ्क राउण्ड १६५ वटा रहेको छ ।

यस्तै प्रहरीको सर्टगनबाट २०१ वटा रबरका छर्रा  र ३ वटा जंगी राउण्ड प्रहार गरिएको प्रतिवेदनमा उल्लेख छ । यस्तै चाइनिज पेस्तोलबाट २ राउण्ड गोली चलाइएको थियो । यस्तै अर्को अर्धस्वचालित हतियार इन्सासबाट ६ राउन्ड गोली चलाइएको थियो । यसरी ब्ल्याङ्क राउण्ड बाहेक प्रहरीले ९२ वटा ‘जंगी राउण्ड’ गोली प्रहार गरेको थियो ।

यस्तै सशस्त्र प्रहरी बलतर्फबाट प्रदर्शन नियन्त्रण गर्न १०४ वटा अश्रृग्यासका सेल, १८ वटा ७.६२ मिमि बालराउण्ड र ७ वटा ब्ल्याङ्क राउण्ड चलाइएको थियो ।

उक्त प्रदर्शनका क्रममा नेपाल प्रहरी र सशस्त्र प्रहरीले जम्मा ११० राउण्ड गोली प्रहार गरेको देखियो भने ९६८ वटा अश्रृग्यास सेल, रबरको छर्रा २०१ र १७२ पटक ब्ल्याङ्क राउण्ड प्रहार गरेको प्रतिवेदनमा उल्लेख छ ।

यी मध्ये महानगरीय नगर प्रहरी कार्यालय भृकुटीमण्डपको तर्फबाट सबैभन्दा बढी गोली प्रहार गरेको पाइएको छ । त्यहाँ कार्यरत प्रहरीहरुले ५१ वटा जंगी राउण्ड, ९६ ब्ल्याङ्क राउण्ड, १४६ वटा रबरका छर्रा र ३४६ वटा अश्रृग्यास सेल प्रहार गरेको प्रहरी रिपोर्टमा उल्लेख छ ।

यस्तै प्रहरी वृत बानेश्वरमा कार्यरत प्रहरीले सर्टगनबाट ३ वटा जंगी राउण्ड, ७ वटा रबरका छर्रा, ११ ब्ल्याङ्क राउण्ड र १६२ वटा अश्रृग्यास सेल प्रहार गरेको पाइएको छ । यस्तै प्रहरी वृत मालीगाउँको तर्फबाट एसएआरबाट १४ जटा जंगी राउण्ड, १२ वटा ब्ल्याङ्क राउण्ड र ३० वटा अश्रृग्यास सेल प्रहार गरिएको थियो ।

यस्तै प्रहरी परिसर काठमाडौंले १४ वटा जंगी राउण्ड, ५ ब्ल्याङ्क राउण्ड, १ वटा रबरका छर्रा र ६५ वटा अश्रृग्यास सेल प्रहार गरेको प्रहरी रिपोर्टमा उल्लेख छ । भने, जिल्ला प्रहरी परिसर ललितपुरको तर्फबाट ३ वटा ब्ल्याङ्क राउण्ड र ३६ वटा अश्रृग्यास सेल प्रहार गरेको थियो ।

यस्तै प्रहरी परिसर भक्तपुरको तर्फबाट ४ वटा रबरको छर्रा र ५ वटा अश्रृग्यास सेल प्रहार भएका छन् । यस्तै सशस्त्र प्रहरी गण १ नक्सालबाट खटिएका प्रहरीले २ वटा जंगी राउण्ड, १५ वटा ब्ल्याङ्क राउण्ड, ५२ अश्रृग्यास सेल र पेस्तोलबाट २ राउण्ड गोली चलाएका थिए । भने, सशस्त्र प्रहरी गण २ महाराजगञ्जबाट खटिएका प्रहरीले ८ वटा अश्रृग्यास सेल प्रहार गरेका थिए ।

यस्तै प्रहरी वृत महाराजगञ्जबाट खटिएका प्रहरीले ११ वटा रबरका छर्रा र ८ वटा अश्रृग्यास सेल हानेको थियो । भने प्रहरी वृत बौद्धले ७ वटा रबरका छर्रा र ३८ वटा अश्रृग्यास सेल हानेको थियो ।

त्यसैगरी भण्डार शाखाको तर्फबाट ९ वटा अश्रृग्यास सेल, काठमाडौं उपत्यका प्रहरी कार्यालय रानीपोखरीको तर्फबाट १ वटा अश्रृग्यास सेल, काठमाडौं उपत्यका ट्राफिक प्रहरी कार्यालय रामशाहपथले २ वटा अश्रृग्यास सेल, प्रहरी पहरा गण सामाखुसीले १३ वटा अश्रृग्यास सेल, काठमाडौं उपत्यका प्रहरी शिक्षालयले २५ वटा रबरका छर्रा र २५ वटा अश्रृग्यास सेल हानेको थियो ।

यस्तै प्रहरी वृत जनसेवाको तर्फबाट ४ वटा अश्रृग्यास सेल प्रहार भएको थियो । भने, प्रहरी वृत गौशालाबाट खटिएका प्रहरीले १० राउण्ड अश्रृग्यास सेल हानेको थियो । त्यस्तै प्रहरी वृत थानकोटको तर्फबाट ५ वटा ब्ल्याङ्क राउण्ड गोली चलेकोमा २१ वटा अश्रृग्यास सेल प्रहार भएका थिए ।

यस्तै प्रहरी प्रभाग कोटेश्वरबाट खटिएका प्रहरीले १७ वटा अश्रृग्यास सेल हानेको थियो भने प्रहरी प्रभाग बलम्भुबाट खटिएका प्रहरीले १८ वटा ब्ल्याङ्क राउण्ड गोली र १२ वटा अश्रृग्यास सेल हानेको थियो ।

प्रदर्शनमा प्रहरीको गोली र छर्रा लागेर २० जना घाइते भएको प्रहरीले बताइसकेको छ । प्रहरीको गोली लागेर किर्तिपुर–४ का सविन महर्जनको मृत्यु भएको थियो । तीनकुने नजिकै गोली लागेका उनको उपचारका लागि लैजाँदै गर्दा बाटैमा मृत्यु भएको थियो ।

गोली लागेका २० जना मध्ये १८ जना पुरूष र २ जना महिला रहेको काठमाडौं उपत्यका प्रहरी कार्यालयले जनाएको छ । २० जनामध्ये ७ जनालाई गोली र बाँकी १३ जनालाई रबरको गोली तथा छर्रा लागेको प्रहरीको रिपोर्ट छ ।

चैत १५ गते नवराज सुवेदी नेतृत्वको ‘राजसंस्था पुनःस्थापनाका लागि संयुक्त जनआन्दोलन समिति’को आयोजनामा काठमाडौंको तीनकुनेमा भएको प्रदर्शनका क्रममा २ जनाको ज्यान गएको थियो ।