

काठमाडौंका मन्दिरमा पिसाब फ्याँकेको आरोपमा क्रिश्चियन धर्मावलम्बी पक्राउ

काठमाडौं- मन्दिरमा मलमूत्र फ्याँकेर दूषित पारेको आरोपमा काठमाडौंको नागार्जुन नगरपालिकाबाट एक महिला पक्राउ परेकी छिन् ।
प्रहरी वृत्त स्वायम्भूको टोलीले काठमाडौंको धोबीचौर घर भई हाल सुकेधारा बस्ने ६१ वर्षीया मिठु तिवारी गर्तौलालाई बिहीबार पक्राउ गरेको हो ।
नागार्जुन नगरपालिका–५ मा रहेको आदेश्वरलगायत मन्दिरमा गत मंसिर १४ गतेयता पटक–पटक मलमूत्र फ्याँक्दै आएको उजुरीका आधारमा प्रहरीले उनलाई पक्राउ गरेको हो ।
गत पुस २६ गते मन्दिरमा कोही नभएको मौका पारी एक जना महिलाले बोतलमा पिसाब लिएर आई आदेश्वर मन्दिर भित्रको मूर्ति समेतमा पिसाब फाली फरार भएको निवेदन प्राप्त भएको थियो ।
नागार्जुनको चुण्डेश्वर मन्दिर, सितापाइलाको गणेश मन्दिर र हरिसिद्धि मन्दिरमा पनि मलमूत्र छर्की दूषित कार्य गरेको सीसीटीभी फुटेज समेतका आधारमा निज महिलालाई पक्राउ गरेको प्रहरीले जनाएको छ ।
प्रारम्भिक अनुसन्धानमा गर्तौलाले २०७६ सालमा हिन्दु धर्म परिवर्तन गरी क्रिस्चियन धर्म मान्दै आएको खुलेको छ ।
उनीमाथि ‘धर्म सम्बन्धी कसुर’मा मुद्दा दर्ता भई काठमाडौँ जिल्ला अदालतबाट ५ दिन थप गरेर थप अनुसन्धान कार्य भइरहेको छ ।

