रविलाई ‘जेल पठाउने’ यी दुई श्रीमानहरू…
कागजपत्र |
काठमाडौं – ८४ दिन हिरासतमा बिताएपछि मुक्त भएका रास्वपा सभापति रवि लामिछाने अन्ततः थुनामा नै जाने भएका छन् ।
जिल्ला अदालत रुपन्देहीको १ करोड धरौटीमा छाड्ने आदेशलाई बदर गर्दै उच्च अदालत बुटवलको तुलसीपुर इजलासले लामिछानेलाई थुनामा पठाउने आदेश दिएको हो ।
जिल्लाको उक्त आदेशलाई उल्ट्याउँदै उच्चका न्यायाधीशद्वय रमेश ढकाल र स्वीकृति पराजुलीको इजलासले रविलाई थुनामा पठाउने आदेश दिएको हो ।
न्यायाधीश ढकाल यही पुस १२ गतेमात्र उच्च अदालत पाटनबाट तुलसीपुर सरुवा भएका हुन् भने पराजुली २०८० भदौ ३१ गते जिल्ला न्यायाधीशबाट उच्च अदालतको न्यायाधीशमा नियुक्ति भएका हुन् । उनी उच्चमा नियुक्ति भएसँगै २०८० असोज २ गते नै तुलसीपुर इजलासमा पदस्थापन भएका थिए ।
शुक्रबार न्यायाधीशद्वयको इजलासमा रवि लामिछाने र छविलाल जोशीको मात्रै मुद्दा परेको थियो । उक्त इजलासले छविलाल जोशीलाई जिल्ला अदालतको फैसलालाई सदर गर्दै थुनामै राख्ने आदेश दिएको हो भने लामिछानेसहितको दुवै मुद्दामा भने जिल्लाको फैसला बदर गर्दै थुनामा पठाएको हो ।
शुक्रबार भएको आदेशपछि रवि निवासमै पुगेर पक्राउ पूर्जी तयार गर्दै प्रहरीले उनलाई पक्राउ गरिसकेको छ । पक्राउपछि लामिछानेले पहिलो रात काठमाडौं परिसरको हिरासतमा रात बिताएका छन् भने अब उनलाई कारागार चलानका लागि आज नै रुपन्देही लगिँदैछ ।
आज र भोली सार्वजनिक बिदा भएका कारण लामिछानेलाई पर्सी अर्थात् सोमबार अदालतमा उपस्थित गराएर जेल चलान गरिने सम्भावना रहेको छ ।
