

भाटभटेनीबाट रक्सी चोर्नेमा रास्वपा नेता पनि !

काठमाडौं- काठमाडौंको तीनकुनेमा राजावादीहरुले गरेको प्रदर्शनका क्रममा आपराधिक गतिविधि गरेको आरोपमा राष्ट्रिय स्वतन्त्र पार्टी(रास्वपा)का एक नेता पक्राउ परेका छन् । रास्वपाको निर्वाचन क्षेत्र समिति खोटाङका पूर्व सभापति समेत रहेका डा. राजकुमार राई पक्राउ परेका हुन् ।
रास्वपाको निर्वाचन क्षेत्र समिति खोटाङका पूर्व संयाेजक समेत रहेका डा. राजकुमार राई राप्रपाका नेताहरुसँग पक्राउ परेका हुन् । प्रहरीले उनको गतिविधिलाई सिसी टिभीमा हेरेर पक्राउ गरेको हो । उनीमाथि भाटभटेनीमा भएको लुटपाटमा रक्सी चोरेकोसमेत अभियोग लगाइएको छ ।
अमेरिकाबाट पिएचडी गरेका राई सिसिआरसी कलेजका निर्देशकसमेत रहेको बताइएको छ। रावाबेसी गाउँपालिका १ घर भएका राई गएको पुस १३ गते राई खोटाङको जिल्ला अध्यक्षमा पराजित भएका थिए । जिल्ला अधिवेशनबाट मुकुन्दकृष्ण थापा जिल्ला अध्यक्षमा निर्वाचित हुँदा राई फराकिलो अन्तरले पराजित भएका थिए ।
थापाले ३० मत पाउँदा डा. राईले ६ मत मात्रै पाएका थिए । डा. राई अध्यक्षमा पराजित भएपछि पार्टीका गतिविधिमा निस्क्रिय बन्दै गएको बताइएकाे छ ।
पहिलो पटक उनलाई ५ दिन र दोस्रो पटक ६ दिनको समय लिएर थुनामा राखेर अनुसन्धान गर्न प्रहरीले काठमाडौँ जिल्ला अदालतबाट अनुमति पाएको छ।

