यान्त्रिक चेकिङमा २४ सवारी साधनका चालक कारबाहीमा
कागजपत्र |
काठमाडाैं – काठमाडौंको कीर्तिपुरमा मङ्गलवार गरिएको विशेष यान्त्रिक चेकिङका क्रममा अवस्था ठिक नराखी सवारी साधन चलाउने २४ वटा सवारी साधनका चालकलाई ट्राफिक प्रहरीले कारबाही गरेको छ ।
कारवाहीको क्रममा लाइट नबल्ने, टायर घिस्रिएका टाटा सुमो, पानी ट्याङ्कर र पिक अप गाडीहरू चलाउँदै गरेका चालकहरूलाई कारबाही गरिएको हो ।
तालिम प्राप्त प्राविधिक सहितको टोलीद्वारा गरिएको चेकिङको क्रममा अवस्था ठिक नभएका २४ वटा, कागजपत्र साथमा नभएका ६ वटा र सवारी चालक अनुमति पत्र नभएका २ वटा सवारी साधनका चालकलाई कारबाही गरिएको काठमाडौं उपत्यका ट्राफिक प्रहरी कार्यालयका प्रवक्ता एवं प्रहरी वरिष्ठ उपरीक्षक राजेन्द्र प्रसाद भट्टले जानकारी दिए । साथै सवारी साधनमा अनावश्यक रूपमा प्रयोग गरिएका १० वटा सवारी साधनका लाइटहरू समेत हटाइएको छ ।
सवारी साधनको अवस्था चेकजाँच गर्न काठमाडौं उपत्यका ट्राफिक प्रहरी कार्यालयबाट प्रहरी नायव उपरीक्षक सत्य नारायण थापाको कमान्डमा आज दिउँसो खटिएको ट्राफिक प्रहरीको टोलीले कीर्तिपुर क्षेत्रमा १ सय ५५ ओटा सवारी साधन चेकजाँच गरेको थियो ।
