सवारी दुर्घटनामा परी ५ को मृत्यु

काठमाडौं – देशका विभिन्न भागहरूमा भएको सवारी दुर्घटनामा परी ५ जनाको मृत्यु भएको छ ।

प्रहरी प्रधान कार्यालयका अनुसार तनहुँ, बन्दीपुर गाउँपालिका-५ याम्पास्थित सडकमा प्र ३-०१-००६ ख ०९२४ नम्बरको बसले ग.१३ प ३५५४ नम्बरको स्कुटरलाई शनिबार दिउँसो ठक्कर दिँदा स्कुटर चालक भानु नगरपालिका-१३ समजुर बस्ने ३२ वर्षीय शेख महमद रखिम मियाको मृत्यु भएको छ । दुर्घटनामा गम्भीर घाइते भएका उनको मोती मेडिकल हल डुम्रे हुँदै थप उपचारको लागि पोखरातर्फ लैजाने क्रममा मृत्यु भएको हो ।

त्यस्तै रौतहट, माधवनारायण नगरपालिका-३ सखुहवास्थित सडकमा ना.१ ज ६७४९ नम्बरको म्याजिक र बा.३९ प ८८६५ नम्बरको मोटरसाइकल एकआपसमा ठक्कर खाई शनिबार दिउँसो दुर्घटना हुँदा २ जनाको मृत्यु भएको छ । मृत्यु हुनेहरूमा सोही नगरपालिका-२ बस्ने ६५ वर्षीय परमात्मा प्रसाद साह र सोही नगरपालिका-३ सखुहवा बस्ने ५५ वर्षीय गौकरण यादव रहेका छन् । दुर्घटनामा गम्भीर घाइते उनीहरूको तराई सिटी अस्पताल सुकदेवचोकमा उपचारको क्रममा मृत्यु भएको हो । म्याजिक चालकलाई प्रहरीले नियन्त्रणमा लिएको छ ।

त्यस्तै रूपन्देही, कञ्चन गाउँपालिका-४ शिवालय चोकमा लु.३७ प ५१५३ र लु.२० प ८७८ नम्बरको  मोटरसाइकल एकआपसमा ठोकिएर शनिबार राति दुर्घटना हुँदा लु.२० प ८७८ नम्बरको मोटरसाइकल चालक अर्घाखाँची पाणिनी गाउँपालिका-६ घर भई कञ्चन गाउँपालिका-५ गरगरेमा सुनचाँदी पसल गरी बस्ने २३ वर्षीय डिल बहादुर बिकको मृत्यु भएको छ । दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । दुर्घटनामा गम्भीर घाइते भएका लु.३७ प ५१५३ नम्बरको मोटरसाइकल चालक कञ्चन गाउँपालिका-४ डायरिचोक बस्ने ३९ वर्षीय गिर बहादुर बिकको स्थानीय मेडिकलमा उपचार भइरहेको छ ।

त्यसैगरी सुनसरी, कोशी गाउँपालिका-८ स्थित सडकमा बीआर ३२ एएच ६२४४ नम्बरको भारतीय मोटरसाइकलको ठक्करबाट पैदलयात्री सोही ठाउँ बस्ने ५९ वर्षीया सीतादेवी मुखियाको मृत्यु भएको छ । ठक्करबाट गम्भीर घाइते भएकी उनको नोवेल अस्पताल विराटनगरमा उपचारको क्रममा मृत्यु भएको छ । मोटरसाइकल चालकलाई प्रहरीले नियन्त्रणमा लिएको छ ।

दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।