बैतडीमा भूकम्प जाँदा भाग्ने क्रममा लडेर मृत्यु

बैतडी – बैतडीमा भूकम्प आएको बेला भागेर घर बाहिर निस्किँदा लडेर एक जनाको मृत्यु भएको छ ।  जिल्लाको डिलाशैनी गाउँपालिका–१, सेल्तडाका ६६ वर्षीय हरि लुहारको भूकम्पको धक्का महसुस भएका बेला भाग्ने क्रममा घरको सिँढीबाट लडेर मृत्यु भएको हो ।

शनिबार राति ८ बजेर १२ मिनेटमा भूकम्प आएको बेला बाहिर भाग्ने क्रममा लडेर घाइते भएका लुहारको राति ११ बजे मृत्यु भएको प्रहरीले जानकारी दिएको छ । जिल्ला प्रहरी कार्यालय बैतडीका अनुसार मृतक ६६ वर्षीय लुहार दमको रोगी थिए ।

घटना स्थलमा जिल्ला प्रहरी कार्यालय बैतडीबाट प्रहरी निरीक्षक योगेश खत्रीको कमाण्डमा प्रहरी टोली खटाइएको जिल्ला प्रहरी कार्यालय बैतडीका प्रवक्ता लोकराज जोशीले जानकारी दिए ।

पारिवारिक स्रोतका अनुसार, भूकम्प आएपछि भाग्ने क्रममा लुहारको मृत्यु भएपछि मृतकका परिवारलाई गाउँपालिका र अन्य सहयोगी निकायका तर्फबाट किरिया खर्च र अन्य सामग्री प्रदान गरिएको छ ।