फेरि फड्कियो विश्वराजको मुद्दा, २६ गते नहुने भयो सुनुवाई !

काठमाडौं – नेपाल प्रहरीको प्रहरी महानिरीक्षक (आईजी) नियुक्तिविरुद्धको मुद्दा फेरि लम्बिने भएको छ ।

सरकारले मुस्लिम धर्मावलम्बीहरुको चाड इदका अवसरमा आगामी २६ गते आइतबार सार्वजनिक विदा दिने घोषणा गरेसँगै आईजी धिरजप्रताप सिंहविरुद्ध प्रहरी अतिरिक्त महानिरीक्षक (एआइजी) विश्वराज पोखरेलले दायर गरेको मुद्दाको सुनुवाई पछि सरेको हो ।

लगातार ४ पटकसम्म हेर्दाहेर्दैमा परेको उक्त रिटबारे आइतबार सुनुवाई नहुने भएपछि कहिले सुनुवाई हुने भन्ने निश्चित भइसकेको छैन ।

यसअघि १९ असारमा का.मु प्रधानन्यायाधीश दीपककुमार कार्की र डा. कुमार चुडालको संयुक्त इजलासमा भएको सुनुवाई नसकिएकोले थप सुनुवाईका लागि असार २६ गतेको पेशी तोकिएको थियो ।  २३ गते अर्थात् आजका लागि बहस नोट बुझाउने आदेश दिएको संयुक्त इजलासले २६ गतेका लागि पेसी तोकेको थियो ।

गत आइतबार धीरजप्रताप सिंह तर्फका १८ जना वकिलहरूले बहस गरेका थिए । आगामी पेसीमा विश्वराजका तर्फका वकिलहरूले जवाफ दिने तालिका रहे पनि सार्वजनिक बिदा परेकोले सो दिन बेञ्च बस्ने छैन ।

मन्त्रिपरिषद्ले वरिष्ठता मिचेर आईजीपी नियुक्त गरी आफूमाथि अन्याय गरेको भनी एआईजी पोखरेलले सर्बोच्च अदालतमा रिट निवेदन दिएका थिए ।

पोखरेलले वैशाख १७ गतेदेखि एक महिना लामो बिदा लिएका थिए । त्यसपछि उनको बिदा सकिए पनि अहिलेसम्म उनी बिना बिदा स्वीकृति कार्यालयमा उपस्थित भएका छैनन् । प्रधान कार्यालयले भने पोखरेलले लामो समय बिना स्वीकृति कार्यालयमा उपस्थित नभएकोले स्पष्टीकरण सोध्ने तयारी गरिरहेको जनाइएको छ ।

कार्यालयले स्पष्टीकरण सोधेर चित्तबुझ्दो जवाफ दिन नसकेमा पोखरेलविरुद्ध कारबाही गर्न सक्ने र जागिरको उत्तरार्द्धमा आएर पोखरेलले आईजीका लागि गरेको ‘चलखेल’ नै ‘कालोधब्बा’का रूपमा लाग्न सक्ने देखिएको छ ।