बैतडीका दुई युवा मृत फेला

बैतडी – बैतडीका दुई युवक सोमबार मृत फेला परेका छन् । दशरथचन्द नगरपालिका-१, खिराका ३४ वर्षीय प्रेमसिंह रावत र सिगास गाउँपालिका-३, तल्लोइनारका १९ वर्षीय घनश्यामसिंह धामी मृत फेला परेका हुन् ।

रावत १७ जेठदेखि बेपत्ता रहेकामा आज स्थानीय मएडा जङ्गलमा मृत फेला परेका बैतडीका निमित्त प्रहरी प्रमुख, प्रहरी निरीक्षक मोहन साउँदले जानकारी दिए ।

रावतको शव सडेगलेको र भिरमा अड्किएको अवस्थामा भेट्टिएको हो । बोल्न नसक्ने र सुस्त मनस्थिति भएका रावतको लडेर मृत्यु भएको हुन सक्ने प्रहरीले जनाएको छ । रावतको शव आफन्तको जिम्मा लगाइएको छ ।

यस्तै धामीको शव सिगास-३ कै सल्लेबगडमा छाप्रेको रूखमा झुन्डिएको अवस्थामा भेट्टिएको हो । उनको शव परीक्षणका लागि पाटन प्राथमिक स्वास्थ्य केन्द्रमा राखिएको छ । दुवै घटनाबारे अनुसन्धान भइरहेकाले जिल्ला प्रहरी कार्यालय बैतडीले जनाएको छ ।