युकेशको ‘लोकल चिया’

राजधानीको शंखमुलस्थित मेडिकल चोकबाट दायाँपट्टि दोस्रो घरको सानो ठाउँ जहाँ हेर्दा चियाको जस्तो थिममा केहि महिना अगाडि खुलेको हो–‘लोकल चिया’ ।

आठ बर्षभन्दा बढी समय हस्पिटालिटी क्षेत्रमा बिताएका युकेश त्रिपाठी आजकाल बिहानैदेखि राती अबेरसम्म चिया पसलमा व्यस्त देखिन्छन् ।

काभ्रे स्थायी घर भएका त्रिपाठी कुनै समय राजधानीकै क्याफेमा हेल्परको रुपमा काम सुरु गरेर देशकै ठूलो रिसोर्टको अपरेशन म्यानेजरसम्म भए । संघर्षका दिनमा दिनको १८ घण्टासम्म काम गरे । जति जिम्मेवारी थपियो त्यति गाह्रो हुने भन्ने कुरा थाहा पाए । तर काम सिक्नको लागि कहिल्यै पनि पछि हटेनन् । कति ठाउँमा त काम गरेको पैसा पनि समयमा पाएनन् । धेरै ठाउँहरुमा काम गरेर दक्षता हासिल गरेका युकेश अन्ततः आफैँले केही गर्नुपर्छ भन्नेमा निश्चित भए । सँगैका कति साथीहरु विदेशतिर लागे, कतिले जागिर नै चेन्ज गर्दै बसे, तर युकेश भने देशमै र आफ्नै केही गर्नुपर्छ भन्नेमा अडिग रहे ।

करिब दुई महिनासम्मको अध्ययन र सामान्य सर्वेक्षणसमेत गरे । अनि मनमा सोच पलायो– चिया पसल । चियाका पुराना गिलास खोजे । फरक स्वादका लागि चियाका थरी थरी मसला बनाए । अनि जन्माए– लोकल चिया ।

अहिले लोकल चियाले बास्मती चिया, पुदिना चिया, धुलिखेल को प्रसिद्ध खुवा लस्सी, मिल्कसेकको स्वाद ग्राहकलाई दिइरहेको छ । बाक्लो दुध चियामा आफैले बनाएको नयाँ स्वादको मसला पहिलोपटक खाँदा छुट्टै स्वाद आउने कुरा उनी ब्यक्त गर्दछन् ।

एकपटक आइसकेका ग्राहकहरु फेरि फर्केर आउनु उनले आफूलाई सफल भएको बताउँछन् । चिया र लस्सी खानकै लागि फर्कि फर्कि आउनेहरुको उपस्थिति नै आफ्नो सफलताको मापक बनेको युकेश बताउँछन् । जसको कारण उनको उत्कृष्ट सेवासहितको फरक स्वाद भएको कुरा लोकल चियाका पाहुनाहरु बताउँछन् । उनी भन्छन् ग्राहक हाम्रा पाहुना हुन् । हामी जे बनाउँछौँ लोकल स्वादमा बनाउँछौँ ।

साँझको समयमा होस्टेल बस्ने विद्यार्थीदेखि बाटो हिँड्नेहरु धाएरै उनको पसलमा चियाको लागि झुम्मिन्छन् । उनी चिया बनाउन र दिनमै व्यस्त हुन्छन् । व्यवस्थापनमा स्नातकोत्तर पढिरहेका उनले सानो ठाउँलाई लिएर नेपालमै पनि केहि गर्न सकिन्छ भन्ने ठूलै सन्देश युवाहरुलाई दिएका छन् ।

चिया खाँदै गर्दा भेटिएका स्याङ्जाका अभिषेक पङ्गेनी भन्छन्, ‘यहाँको बास्मती चियाको स्वाद नौलो अनि स्पेशल छ । दिनहुँ नआई चित्तै बुझ्दैन । अझ लस्सी त इन्द«चोकको भन्दा पनि मिठो, आहा ।’

त्यस्तै पुरानो बानेश्वरका राजन मानन्धर पनि लस्सी खाँदै गर्दा भेटिए । उनी नाकको टुप्पामा लागेको लस्सी पुछ्दै भन्छन् । ‘यहाँको खुवा लस्सीको स्वाद खाउँ खाउँ लाग्ने छ । त्यसमाथि युवाको आफ्नो ठाउँप्रतिको मायाँ देखेर पनि म यहाँ नआइ रहन सक्दिन अचेल ।’

लोकल चियामा अहिले दश थरीका चिया पाइन्छ । त्यसमा पनि पुदिना चिया, बास्मती चिया र खुवा लस्सि ग्राहकले धेरै रुचाउने पेय पदार्थ भएको उनी बताउँछन् ।

मृदुभाषी अनि हँसिला युकेश थुप्रै होटेल, रेस्टुरेन्ट, रिसोर्टमा काम गरेका उनी ग्राहकको रोजाइमा पर्थे । काम गर्ने शैली, उनको मिहेनतलाई धेरैले प्रशंसा गर्दथे । जहाँ काम गर्थे उनी त्यहाँ सबै काम गर्ने साथीहरुलाई परिवार मान्थे । आफुले जानेको सबै सिकाउँथे । आफँै पनि गर्थे । हरेक गेष्टको टेबुलमा पुग्थे । कुनैपनि काम सानो ठुलो भन्दैनथे, त्यो काम नै युकेशको हरेक सञ्चालकको नजरमा पर्ने माध्यम थियो ।

पछिल्लो समय उनी काठमाडौँको पुरानो रेस्टुरेन्ट इन्द्रेणी गु्रपमा ब्रान्च म्यानेजर थिए । त्यहि गु्रपको सञ्चालक शम्भु श्रेष्ठको प्रेरणाले आफ्नै केहि गरौँ कि भन्ने सोच बनाए । गहिरो अध्ययन गरे । बैदेशिक रोजगारीका लागि देशमा तँछाडमछाड चलिरहेको बेला देशमा युकेश जस्ता युवाहरुले आत्मनिर्भरका लागि नयाँ नयाँ क्षेत्रमा हात हाल्नु प्रेरणाको स्रोत बन्न सक्छ । विदेशिन चाहने युवाका लागि प्रेरणाको स्रोत बनेका युकेशले दुईमहिना अगाडिबाट आफ्नो सेवा दिन थालेका हुन् । सुरुवात समयमै प्रशस्त गं्राहकको मन जित्न सफल युकेशको लोकल चियाले गर्दा अहिले केही हौसिएका पनि छन् । हरेक नेपालीको भान्सामा पाक्ने चियालाई केही हदसम्म भए पनि ब्रान्डिङ गर्न आफू सफल भएको ठान्ने युकेशले केही महिनाको प्रतिक्रिया र बजारलाई हेरेर देशका विभिन्न स्थानमा पनि शाखा विस्तार गर्ने योजनामा छन् ।

व्यवस्थापनका विद्यार्थीले सञ्चालनमा ल्याएको ‘लोकल चिया’लाई ब्रान्डको रुपमा लैजाँदै गरेका युकेशलाई बधाई अनि शुभकामना ।