यस वर्षको सम्यक महादान पर्व औपचारिकतामा सीमित हुने

भादगाउँ–प्रत्येक वर्ष माघे सङ्क्रान्तिका अवसरमा भक्तपुरमा मनाइने सम्यक महादान पर्व यस वर्ष नहुने भएको छ । कोरोना महामारीको जोखिमका कारण भक्तपुर नगरपालिकाको पहलमा यस वर्ष स्थगित गरी सम्यक महादान पर्वलाई औपचारिकता मात्र प्रदान गर्न लागेको हो ।

सम्यक महादान पर्वका सरोकारवालाहरु र नगरपालिकाबीच आज बसेको बैठकले यस वर्ष पर्वलाई औपचारिकतामा सीमित गर्ने निर्णय भएको भक्तपुर नगरपालिकाका प्रमुख सुनिल प्रजापतिले जानकारी दिए ।

बैठकमा नगरप्रमुख प्रजापतिले भक्तपुरमा कोरोनाको अवस्था, यसको रोकथामका लागि नगरपालिकाले गरेको प्रयासका बारेमा संक्षिप्त जानकारी दिँदै यस वर्षको सम्यक महादान पर्वलाई स्थगित गर्न आग्रह गरेका थिए ।

बैठकमा सहभागी सम्यक महादान पर्वका सरोकारवालाहरुले कोभिडको जोखिमलाई ध्यानमा राखी यस पटकका लागि सम्यक महादान पर्व सामान्य पूजाआजामा सीमित गर्न सहमति जनाएका छन् ।

सम्यक महादान पर्वमा भक्तपुरका विभिन्न बहाल र विहारमा रहेका भगवान् गौतम बुद्ध, दीपङ्कर बुद्धहरुलाई दूधपाटीस्थित थथुबही ल्याइन्छ । त्यहाँ जम्मा गरिएको दीपङ्कर बुद्धलगायत बुद्ध र बौद्धधर्म गुरुहरुलाई स्थानीयवासीले आ–आफ्नो इच्छा र गच्छेअनुसार विभिन्न पकवान्, अन्नलगायत वस्तु दान दिने गर्दछ ।

सम्यक महादान भक्तपुरमा प्रत्येक वर्ष, ललितपुरमा हरेक ५ वर्षमा र काठमाडौँमा १२ वर्षमा मनाइने परम्परा छ । बैठकमा प्रसन्नशील महाविहार— क्वाठण्डाँै, मङ्गल धर्मदीप महाविहार—झौरबही, चर्तुब्रह्म महाविहार—दरबार क्षेत्र, बौद्ध समंकृत विहार—कुथुबही र जयकृति महाविहार—थथुबहीका प्रतिनिधिहरुको उपस्थिति थियो ।

(रासस)