प्रदेश २ डीआईजी रञ्जीतकारले खटाएकी महिलाले यसरी गर्छिन् बार्गेनिङ (अडिओसहित)
सुजन पन्त |
काठमाडौं – दुई नम्बर प्रदेश प्रहरी प्रमुख नायब महानिरीक्षक (डीआईजी) उमेश रञ्जीतकारले खटाएकी महिलाले पीडितसँग बार्गेनिङ गरेको अडिओ फेला परेको छ।
रौतहटको गरुडास्थित नेपाल पुलिस स्कुलमा खाली रहेको शिक्षक पदमा स्थायी नियुक्ति दिलाइदिने भन्दै डीआईजी रञ्जीतकारको नाम लिँदै तिम महिलाले पैसामा बार्गेनिङ गरेकी छन्।
अनलाइनन्यूजलाई प्राप्त अडिओेमा सर्लाहीकी सुशीला थापा दाहालले पर्सा मणिपुरका उदासकुमार पाण्डेसँग ६ लाख रुपैयाँ बार्गेनिङ गरेको सुन्न सकिन्छ । अडिओमा दाहालले पाण्डेसँग पैसाको बार्गेनिङ गर्दा सोचेको भन्दा बढी डिमाण्ड भएको बताएकी छिन्।
दाहालले ६ लाख भन्दा कम रकममा कुरा नमिल्ने बताउँदै ३ जना मिलेर काम गरिदिने बताएकी छिन्। दाहालकाअनुसार पैसा पाएपछि पुलिस स्कुलका प्रिन्सिपल, डीआईजी र अर्का एक व्यक्ति मिलेर पाण्डेलाई स्थायी गरिदिने हो।
पाण्डेसँग कुराकानी हुँदै गर्दाका बखत डीआईजी रञ्जीतकारले आफूलाई फोन गरेको भन्दै दाहालले फोन समेत काटिदिएकी छिन् । जतिबेला दाहालले भनेकी छन्, ‘ए ल ल। उमेश, क्यारे ऊ–ऊ रञ्जीत, डीआईजीसा’पले नै फोन गर्नुभयो। ल ।’
त्यसपछि पाण्डेले दाहाललाई फोन गर्दै बैंकमा राखेको भौचर फेसबुक म्यासेन्जरमा पठाईदिने बताएका छन्। दाहालले बैंकमा पैसा कुर्दै गर्दाखेरी पाण्डेले रौतहटको कुनै होटलमा खाजा खाएमा आफूले भनिदिने समेत बताएका छन्।
बैंकमा काम ढिलो भएको जनाउँदै पाण्डेले दाहाललाई फोन गरेपछि छिटो काम गर्नका लागि बैंक म्यानेजरलाई भनिदिने समेत अडिओेमा सुन्न सकिन्छ। यी माथिका वार्तालापको अडिओे डीआईजीसँग जोडिएकी महिला र पीडितबीचको हो।
यस्तो छ दाहाल र पाण्डेबीचको फोन संवाद
उदासः दिदी
सुशीलाः हजुर, कहाँ छौं तिमी?
उदासः म गाउँमा छु दिदी।
सुशीलाः ए त्यो त्यहि त। कुरा भयो होइन।
उदासः हजुर
सुशीलाः अनि तिमीले सोचेको भन्दा अलि बेसिक डिमान्ड छ के गर्नी?
उदासः हुन्छ। कुरा गर्दिनु न। स्थायी भयो भने त भैगो नि। जागिर भएपछि त भइगो नि।
सुशीलाः अँ अँ। त्यही ६ भन्दा घटी उसले काम नगर्नी रे। ३ जना मिलेर गर्ने रहेछन्।
उदासः हजुर।
सुशीलाः प्रिन्सिपल, डिआईजी र अर्का एकजना बाहिरका मान्छे, खोई को भन्दै हुनुहुन्थ्यो। हस्पिटलमा आमा बिरामी भएर हस्पिटल गएको छु।
उदासः हजुर
सुशीलाः अनि त्यहि भन्नुभयो। त्यहाँभन्दा घटेर काम नगर्नी भन्दिनुभयो डाइरेक्ट।
उदासः ओके काम गर्नुस्। स्थायी गरिदिन्छ?
सुशीलाः अँ अँ।
उदासः ल काम गर्नुस् म गर्छु।
सुशीलाः ए ल ल। उमेश, क्यारे ऊ ऊ रञ्जीत, डिआईजीसा’पले नै फोन गर्नुभयो। ल
उदासः ल ल।
अडिओ सुन्नुहोस्
पीडित पाण्डेसँग पैसा माग्नुको कारण के ? अझै खुल्दै जाला ।
यस्तो छ घटनाक्रम
विगत पाँच वर्षदेखि रौतहटको गरुडास्थित पुलिस स्कुलमा करारमा अध्यापन गर्दै आएका थिए पाण्डे। १६ चैतमा शिक्षक पदपूर्तिका लागि भएको परिक्षापछि पाण्डेले लिखितमा नाम निकाले। जतिबेला आफू एक्लैको नाम निस्किएको पाण्डेको दाबी छ।
स्थायी नियुक्तिका लागि लिखितमा नाम निस्किएपछि पाण्डेले अन्तर्वार्ता दिए। पाण्डेको अन्तर्वार्ता लिनेमा प्रदेश २ प्रहरी कार्यालयका प्रहरी नायब उपरीक्षक (डिएसपी) छेदिलाल कामती, प्रहरी निरीक्षक (इन्सपेक्टर) द्वय सुरेश अधिकारी र राजन ढकाल थिए। इन्सपेक्टर ढकाल पुलिस स्कुलका समादेशक समेत हुन्।
पाँचवर्षदेखि लगातार रुपमा सोही विद्यालयमा अध्यापन गराउँदै आएका एक्ला उम्मेदवार पाण्डेलाई विद्यालयका प्रिन्सिपल सिताराम भट्टराईको योजनामा अन्तर्वार्तामा फालियो। उनलाई अन्तर्वार्तामा अयोग्य सावित गर्नका लागि प्रिन्सिपल भट्टराईले प्रहरीसँगको मिलेमतोमा अनेक प्रपञ्च रचेको स्रोत बताउँछ।
त्यसपछि प्रहरी र प्रिन्सिपलको मिलेमतोमा अन्तरवार्तामा फालिएका पाण्डे कानुनी लडाईंको लागि लड्न काठमाडौं आए। सहयोगको आशासहित काठमाडौं आएका पाण्डेले कहिँकतैबाट सहयोग नपाएपछि गृहप्रवक्ता फणिन्द्र पोखरेललाई घटनाबारे जानकारी गराए।
तत्कालै गृह प्रवक्ता पोखरेलले ठाडो आदेश दिँदै डीआईजी रन्जितकारलाई घटनाबारे बुझ्न निर्देशन दिए। त्यतिमात्र होइन, गृह प्रवक्ता पाठकले घटनाबारे प्रहरी प्रधान कार्यालयलाई समेत परिपत्र गरे। गृहको पत्रपछि प्रहरी प्रधान कार्यालयले प्रदेश प्रहरी कार्यालयलाई घटनाबारे सत्यतथ्य छानबिन गर्न निर्देशन दियो।
गृहमन्त्रालय र प्रधान कार्यालयबाट आफूलाई सत्यतथ्य बुझ्न निर्देशन आएपछि डीआईजी रन्जितकार पाण्डेसँग झनै रुष्ट भए।
गृह प्रवक्ता र प्रधान कार्यालयको निर्देशनपछि डीआईजी रञ्जीतकारले घटनाको सत्यतथ्य छानबिन गर्न इलाका प्रहरी कार्यालय गरुडाका तत्कालिन प्रमुख डिएसपी रवि रावलको संयोजकत्वमा, इन्सपेक्टर राजाराम केसी र प्रहरी नायब निरीक्षक (सई) सदस्य रहनेगरी ३ सदस्यीय छानबिन समिति गठन गरे।
त्यतिमात्र होइन यता संघीय प्रहरी ईकाई प्रहरी कार्यालय, जनकपुरले समेत छानबिन समिति गठन गर्यो। संघीय प्रहरी कार्यालयका इन्सपेक्टर चण्डेश्वर यादवको संयोजकत्वमा जिल्ला प्रशासनको एकजना प्रतिनिधिसहित छानबिन समिति गठन भएको थियो।
छानबिनको म्याद सकिएपछि दुवै समितिले बुझाएको प्रतिवेदनमा ‘पुनः अन्तरवार्ता लिएर पाण्डेलाई जागिरमा जोड्नु र अन्तरवार्ता लिनेहरुलाई कानुनअनुसार कारबाही गर्नु’ भनिएको थियो। तर, डीआईजी रन्जितकारले समितिको प्रतिवेदनको धज्जी उडाउँदै उल्टो १ साउनमा पाण्डेलाई जागिरबाट निकाले।
त्यसपछि २७ भदौ २०७८ मा स्कुलको होस्टेलमा बस्दै आएका पाण्डेलाई विद्यालय प्रशासनले ‘होस्टेल खाली गरिदिने सम्बन्धमा’ पत्र काट्यो।
‘यस विद्यालयको निमावि करार शिक्षकको रुपमा कार्यरत रहँदा यस विद्यालयको छात्राबासको घर, कोठा प्रयोग गरि बसिराख्नु भएकोमा हाल तपाईं कार्यरत नरहेकाले उक्त कोठामा ताल्चा चाबी लगाइएको हुँदा तपाईले उक्त कोठाबाट आप्mनो सरसामान झिकि कोठा खालि गरिदिनुहुन अनुरोध गरिएको छ,’ समादेशक राजन ढकालद्वारा हस्ताक्षरित पत्रमा भनिएको छ।
(डिआईजीले पैसा उठाउन महिलालाई खटाएको खबरबारे हामी निरन्तर फलोअपमा छौँ। अर्को अडियोसहितको समाचार पढ्न अनलाइनन्युज७ खोल्दै गर्नुहोला।)
