विजय गच्छादारः देउवा प्रधानमन्त्री भएको भोलीपल्ट अदालतमा उपस्थित, १० लाखमा रिहा

काठमाडौं– बालुवाटारस्थित ललितानिवासको सरकारी जग्गा व्यक्तिको नामसारी गर्ने मुद्दामा अख्तियार दुरुपयोग अनुसन्धान आयोगले मुद्दा चलाएका कांग्रेस उपसभापति तथा पूर्वउपप्रधानमन्त्री विजयकुमार गच्छादार १० लाख धरौटीमा रिहा भएका छन्।

उनी विशेष अदालतको म्याद नबुझेका कारण फरार सूचीमा रहेका थिए। उनको सुनसरीस्थित घरमा अदालतले पूर्जी टाँसेको थियो।

आयोगले मुद्दा चलाएपछि म्याद नबुझी गच्छादार फरार थिए। देउवा शक्ति केन्द्रको कार्यकारी जिम्मेवारीमा पुग्नासाथ गच्छादार अदालतमा हाजिर हुनुलाई अर्थपूर्ण मानिएको थियो।सम्भवतः शक्तिको आडमा नै अदालतले गच्छादारलाई धरौटीमा रिहा गर्न सक्ने आँकलन अनुसार निर्णय आएको छ।

०७७ फागुनमा विशेष अदालतले १५ दिनभित्र अदालत उपस्थित हुनु भनी म्याद पठाएपछि गच्छदार उपस्थित नभई फरार थिए। उनको नाममा पुनः म्याद जारी गरेको थियो।

गच्छदारविरुद्ध ९ करोड ६५ लाख ७६ हजार बिगो माग गर्दै अख्तियारले भ्रष्टाचार मुद्दा दायर गरेको थियो। गच्छादार देउवानिकट नेता हुन्। उपसभापति विमलेन्द्र निधिले कांग्रेस महाधिवेशनमा सभापतिमा दाबी गरेपछि देउवाले गच्छादारलाई चेपेका छन्।