गण्डकी प्रदेश : मुख्यमन्त्री विरुद्ध दर्ता भएको अविश्वास प्रस्तावमा हुने मतदान मिति लम्बियो

पोखरा – गण्डकी प्रदेशको मुख्यमन्त्री पृथ्वी सुब्बा गुरुङ विरुद्ध दर्ता भएको अविश्वास प्रस्तावमा मतदानका लागि भने केही दिन कुर्नुपर्ने भएको छ ।

प्रदेशसभाको विशेष बैठक सोमबार बस्ने भए पनि मुख्यमन्त्रीविरुद्ध दर्ता भएको अविश्वास प्रस्तावमा मतदानका लागि भने केही पछि धकेलिएको हो ।

विशेष अधिवेशनको पहिलो बैठकमा कुनकुन विषयमा छलफल गर्ने भन्ने सन्दर्भमा निर्णय गर्न आइतबार बसेको कार्यव्यवस्था समितिको बैठकले १५ गतेभित्र मतदान गर्ने सहमति गरेको हो ।

बैठकमा पहिलो दिनमै मतदान गर्ने गरी छलफल अगाडि बढाइएको भए पनि पहिलो दिन सबै दलका नेताले बोलेपछि मुख्यमन्त्री पृथ्वी सुब्बा गुरुङले जवाफ दिने कार्यसूची बनाइएको छ ।

सांसदहरु बोल्ने क्रम पहिलो दिनमै सकिएको अवस्थामा मंगलबार अविश्वास प्रस्ताव उपर मतदान हुने छ । सांसदहरु बोल्ने क्रम लम्बिएको अवस्थामा तेस्रो दिन अर्थात १५ गते अविश्वास प्रस्तावमाथि मतदान प्रक्रियामा जानेगरी कार्यसूची तय गर्ने सहमति भएको सांसद दिपक कोइरालाले जानकारी दिए ।

मुख्यमन्त्री गुरुङबिरुद्ध अविश्वासको प्रस्ताव दर्ता भएपछि प्रमुख प्रतिपक्ष दलसहितका तीन दलले विशेष अधिवेशन माग गरेबमोजिम प्रदेश प्रमुख अमिक शेरचनले सोमबारका लागि विशेष अधिवेशन आह्वान गरेका हुन् ।

कार्यव्यवस्था समितिको बैठकमा नेकपा एमाले, काँग्रेस, माओवादी केन्द्र र जनता समाजवादी पार्टी सहभागी भएका छन् । काँग्रेसका १५, माओवादी केन्द्रका ११, जनता समाजवादी पार्टीका २ गरि २८ जना सांसदले अविश्वासको प्रस्ताव दर्ता गराएका हुन् । अविश्वास प्रस्तावमा राष्ट्रिय जनमोर्चाले समेत समर्थन गर्ने औपचारिक निर्णय गरिसकेको छ ।