यी ११ प्रहरीलाई हेडक्वार्टरको ताकेता, ७ दिनभित्र सम्पर्कमा नआए जागिर चट् !

काठमाडाैं – नेपाल प्रहरीका ११ जना कर्मचारी लामो समयदेखि सम्पर्कविहीन भएका छन्।

प्रहरी प्रधान कार्यालयले जानकारी बिना लामोसमयदेखि ड्युटीमा हाजिर नभएका २ असईसहित ११ जनालाई सात दिनभित्र सम्पर्कमा आउन निर्देशन दिएको हो ।

यसअघि पटकपटक सम्पर्कका लागि आह्वान गरिए पनि सम्पर्कमा नआएपछि राष्ट्रिय दैनिकमा नै सूचना प्रकाशन गरेर उनीहरुलाई सम्पर्कमा आउन निर्देशन दिइएको हो । प्रहरी प्रधान कार्यालयले ‘तोकिएको समयमा सम्पर्कमा नआए सेवाबाट बर्खास्त गरिने’ चेतावनी दिएको छ। तोकिएको म्यादभित्र स्पष्टीकरणसहित उपस्थित नभए प्रहरी नियमावली, २०७१ को नियम ११३ को उपनियम (१) को खण्ड (च) को कसुरमा नियम १०९ को देहाय (ख) (१) बमोजिम सेवाबाट हटाउने कारबाही हुने सूचनामा उल्लेख छ।

सम्पर्कविहीन हुनेमा दुई जना प्रहरी सहायक निरीक्षक (असई) रहेका छन्। काठमाडौं उपत्यका प्रहरी कार्यालय, रानीपोखरी दरबन्दी भएका असई तीर्थबहादुर बुढा र इलाका प्रहरी कार्यालय लेकबेसी, सुर्खेतका असई दुर्गाराज मल्ल लामो समयदेखि गैरहाजिर छन्।

त्यसैगरी, ओखलढुंगामा प्रमुख जिल्ला अधिकारीको निवास गार्डमा कार्यरत प्रहरी जवान नागेश्वर यादव, मधेस प्रदेश प्रहरी तालिम केन्द्रका प्राविधिक प्रहरी जवान सुबोधप्रसाद पटेल र भरतपुर विमानस्थल सुरक्षा गार्डका जवान देवकृष्ण राउत पनि सम्पर्कमा छैनन्। इलाका प्रहरी कार्यालय चन्द्रावती, तनहुँकी जवान जयन्ती थापामगर र इलाका प्रहरी कार्यालय कोहलपुर, बाँकेका जवान सञ्जय परियारलाई पनि स्पष्टीकरणसहित हाजिर हुन भनिएको छ।

कर्णाली प्रदेश प्रहरी कार्यालयका प्राविधिक प्रहरी जवान गीता मेदासी र प्रहरी जवान राजकुमार रावत पनि आफूखुसी गैरहाजिर छन्। यस्तै, जिल्ला ट्राफिक प्रहरी कार्यालय कञ्चनपुरका जवान ध्रुवराज पाध्या र कारागार सुरक्षा गार्ड लमजुङका प्रहरी कार्यालय सहयोगी सुरेश कुमाल पनि लामो समयदेखि सम्पर्कविहीन रहेको प्रहरी प्रधान कार्यालयले जनाएको छ।