खुर्कोट हिरासत मृत्यु प्रकरणमा १० प्रहरीमाथि कारबाही सिफारिस

सिन्धुलीको सुनकोशी गाउँपालिका–३ जुम्लीडाँडाका २३ वर्षीय श्रीकृष्ण विक हिरासतमा मृत फेला परेपछि प्रहरी नायब महानिरीक्षक दिनेश कुमार आचार्य नेतृत्वको छानबिन समिति गठन गरिएको थियो ।

समितिले घटनामा लापरबाही देखिएको ठहर गर्दै एक जनालाई सचेत गराउने, दुई जनालाई ध्यानाकर्षण गराउने, पाँच जनालाई सख्त चेतावनीसहित जिम्मेवारीबाट अलग गर्ने सिफारिस गरेको छ । साथै एक जनालाई नसिहत र अर्का एक जनालाई ग्रेड घटुवा गर्न सुझाव दिएको छ ।

समितिले हिरासतमा रहेका व्यक्तिको जीवन सुरक्षालाई उच्च प्राथमिकतामा राख्न, हिरासत व्यवस्थापन कार्य निर्देशन–२०८१ प्रभावकारी रूपमा लागू गर्न तथा नियमित निगरानी प्रणाली अनिवार्य बनाउन सुझाव दिएको छ ।

ड्युटीका बेला अन्य काममा संलग्न नहुने, हिरासतभित्र असामान्य गतिविधि भए तुरुन्त रिपोर्ट गर्ने व्यवस्था लागू गर्नुपर्नेमा पनि समितिले जोड दिएको छ ।

यस्तै, अन्तर्जातीय सम्बन्ध, नाबालिग संलग्नता तथा सामाजिक तनाव उत्पन्न हुन सक्ने घटनामा अनुसन्धान गर्दा कार्यालय प्रमुखको प्रत्यक्ष निगरानी र सक्रिय संलग्नता आवश्यक रहेको समितिको निष्कर्ष छ ।

समितिले जिल्ला प्रहरी प्रमुखलाई हिरासत व्यवस्थापनमा नियमित अनुगमन र निरीक्षण प्रभावकारी बनाउन तथा प्रहरी इकाइहरूमा सुधारमुखी कार्ययोजना लागू गर्न समेत सुझाव दिएको छ ।