साइबर अभद्रताविरुद्ध एलिना र समीक्षाको खुला ‘एक्सपोज’ अभियान

काठमाडौं – पछिल्ला दिनमा गायिकाहरू एलिना चौहान र समीक्षा अधिकारीले सामाजिक सञ्जालमा अभद्र टिप्पणी गर्ने प्रयोगकर्ताहरूलाई ‘एक्सपोज’ गर्ने अभियान थालेका छन्। उनीहरूले गालीगलौज र असभ्य कमेन्ट गर्ने व्यक्तिहरूका नाम, फोटोसहितको प्रोफाइल सार्वजनिक गर्दै सामाजिक सञ्जालमै जवाफ दिँदै आएका छन्।

समीक्षाले एक व्यक्तिको परिवारसहितको तस्बिर शेयर गर्दै “उहाँको पनि छोरीहरू छन्, तपाईंहरू के भन्नुहुन्छ?” भन्दै प्रश्न गरेकी थिइन्। त्यसपछि ती व्यक्तिले सार्वजनिक रूपमा माफी मागेका थिए। एलिनाले समेत इन्स्टाग्राम स्टोरीमार्फत यस्ता प्रयोगकर्ताहरूको स्क्रिनसट सार्वजनिक गरेपछि उनीहरूसँग माफी माग्ने क्रम सुरु भएको छ।

यो अभियानलाई विभिन्न कलाकारले खुलेर समर्थन गरेका छन्। अभिनेत्री केकी अधिकारीले ‘अत्याचारको मूल्य तिर्नु पर्छ’ भन्दै प्रशंसा गरिन्। कलाकार निर्मल शर्मा, निर्माता रोहित अधिकारी, अभिनेत्री नीता ढुंगाना, र अभिनेता दीपकराज गिरीलगायतले सामाजिक सञ्जालमै पोस्ट गरेर दुवै गायिकाको साहसको सराहना गरेका छन्।

दीपकराज गिरीले त लेख्दै भने, “साइबर ब्यूरोभन्दा बलियो सजाय दिएर तिमीहरूले गाली सम्राटहरूलाई सञ्जालमै उदांगो पार्यौ। यो साहसी कदमका लागि शुभकामना!”

गायिकाहरूको यो कदम साइबर दुर्व्यवहारविरुद्ध सशक्त सन्देशका रूपमा हेरिएको छ।