रातीको समयमा चोरी गर्ने ३ सहित चोरीको सुन खरिद गर्ने ६ जना पक्राउ

काठमाडौं – काठमाडौंमा रातीको समयमा चोरी गर्ने कार्यमा संलग्न रहेको आरोपमा प्रहरीले ६ जनालाई पक्राउ गरेको छ ।

काठमाडौँ उपत्यका अपराध अनुसन्धान कार्यालयको टोलीले भारतीय नागरिकहरु सञ्जीव बाँनियाँ, कृष्ण पोदार र किसन गिरीलाई पक्राउ गरेको हो । यस्तै प्रहरीले चोरीको सुन खरिद गरेको आरोपमा बिक्रम गर्तौला, रमेश विश्वकर्मा र डिल्लीराम विश्वकर्मालाई पनि पक्राउ गरेको छ ।

गत असार १५ गते काठमाडौँ महानगरपालिका वडा नम्बर ९ शम्भुमार्गस्थित भगवती श्रेष्ठको घरबाट सुनका बिभिन्न गरगहना गरी करिब एक लाख असी हजार रुपैयाँ बराबरको धनमाल चोरी भएको थियो । यस्तै कात्तिक पहिलो साता बिजयचोक स्थित बालकृष्ण श्रेष्ठको डेरा कोठाबाट सुनका बिभिन्न गरगहना तथा नगद गरी जम्मा तेह्र लाख अन्ठाउन्न हजार बराबरको धनमाल चोरी भएको थियो ।

उक्त घटनाको अनुसन्धानको क्रममा उक्त चोरी कार्यमा संलग्न तीन जनालाई कार्यालयबाट खटिएको प्रहरी टोलीले उपत्यकाका बिभिन्न स्थानबाट पक्राउ गरेको हो । पक्राउ परेकाहरुलाई थप अनुसन्धान तथा कारबाहीको लागि प्रहरी वृत गौशला पठाइएको प्रवक्ता रवीन्द्र रेग्मीले जानकारी दिए ।