डिआईजीको मुद्दा आज पनि पेसीमा, न्यायाधीश चुडालको एकल इजलासमा सुनुवाई हुँदै
कागजपत्र |
काठमाडौं – प्रहरी नायव महानिरीक्षक (डीआईजी) हरू ईश्वरबाबु कार्कीलगायतले प्रहरी अतिरिक्त महानिरीक्षक (एआईजी) पदमा भएको बढुवा सिफारिस निर्णयविरुद्ध दायर गरेको रिटको लगातार तेस्रो दिन आज पनि पेसी तोकिएको छ ।
आइतबार र र सोमबार लगातार दुई दिनसम्म न्यायाधीश कुमार रेग्मीको एकल इजलासमा तोकिएर ‘हेर्न नमिल्ने’ सूचीमा परेको उक्त रिट आज न्यायाधीश डा. कुमार चुडालको इजलासमा परेको छ ।
बरियताअनुसार बढुवा नभएको भन्दै कार्कीसहित डिआईजी घनश्याम अर्याल र प्रकाश जंग कार्कीले रिट दायर गरेका थिए ।
तीन डीआईजी गृह सचिव टेकनारायण पाण्डे नेतृत्वको बढुवा समितिले एआईजी पदमा बढुवा गर्दा विभेद गरेको भन्दै सर्वोच्च अदालत पुगेका हुन् ।
रिटमा उनीहरूले कनिष्ठ डीआईजीलाई एआईजीमा बढुवा गर्न सिफारिस गरिँदा आफूहरूमाथि विभेद भएको भन्दै बढुवा सिफारिस गर्ने निर्णय बदरको माग गरेका छन् ।
सर्वोच्च जानुअघि उनीहरूले बढुवाविरुद्धको सुनुवाइ समिति पुगेर उजुरी दिएका थिए । समितिले बढुवा गर्ने निर्णयमा कैफियत नदेखिएको ठहर गरेको थियो ।
त्यसपछि गएको बिहीबार बिहान बसेको मन्त्रिपरिषद् बैठकले बढुवा सिफारिस भएका डीआईजीहरू वसन्तकुमार पन्त, धीरजप्रताप सिंह र रवीन्द्रबहादुर धानुकलाई बढुवा गर्ने निर्णय गरेको थियो ।
उता बढुवा भएका एआईजीहरुले दर्ज्यानी चिन्ह लगाइसकेर काममा लागि सकेको अवस्था छ ।
