प्रकाश सपुतले बनाउने भए ‘वसन्त’, कहिले होला त रिलिज ?
कागजपत्र |
काठमाडौं — गीतहरुमा कथा भन्र्दै सिर्जना बाहिर ल्याउने चर्चित लोकगायक एवं सर्जक प्रकाश सपूतले चलचित्र निर्माणको घोषणा गरेका छन् । गायनमार्फत लोकप्रिय बनेका उनले सिनेमा निर्माणको घोषणा गरेका हुन् ।
प्रकाशले आइतबार काठमाडौंमा आयोजित एक कार्यक्रममार्फत चलचित्रको नाम र कलाकारबारे जानकारी गराएका छन् । ‘वसन्त’ नामक चलचित्रको मुख्य भूमिकामा प्रकाश स्वयं रहनेछन् । उनको अपोजिटमा स्वस्तिमा खड्का हुनेछिन् । चलचित्रमा अनुप बराल, कमलमणि नेपाल, प्रकाश घिमिरेलगायत कलाकारको अभिनय रहनेछ ।
चलचित्रको निर्देशन पनि प्रकाश आफैँले गर्नेछन् । सिनेमामा लेखन र संगीत समेत प्रकाशकै हुनेछ । चलचित्र आउँदो चैते दसैँमा रिलिज गरिने उनले बताएका छन् ।
सिनेमामा कार्यकारी निर्माता मोहन विश्वकर्मा, अनुरोध भट्टराई र नेन्सी शेरचन रहनेछन् ।
प्रकाशले चलचित्र ‘परदेशी–२’ मा अभिनय गरेका थिए । सोही सिनेमाबाट अनुभव हासिल गरेर आफैँ निर्माणमा आएको उनले बताएका छन् । गीतमा जस्तै चलचित्रमा पनि दर्शकको माया पाउने उनको विश्वास छ ।
आफ्नो सिनेमाको छायांकनअगाडि उनले ‘पूर्णबहादुरको सारङ्गी’मा अभिनय गर्नेछन् ।
