कांग्रेस अधिवेशनलाई शेखर समूहले टुंग्यायो १० जिल्लामा उम्मेदवार

काठमाडौँ – कांग्रेसको १४औँ महाधिवेशनअन्तर्गत जिल्ला अधिवेशन हुन बाँकी रहेका १६ अन्तरर्गत ६जिल्लामा फागुन १५ गते र बाँकी जिल्लामा  फागुन २० भित्र सक्नुपर्ने निर्वाचन कार्यतालिका छ ।

जिल्लाको नेतृत्वका लागि कांग्रेसभित्र उम्मेदवार टुंग्याउने चटारो छ। नेता डा.शेखर कोइराला समूहले शुक्रबार काठमाडौँमा भेला गरेर १० जिल्लामा आफ्नोतर्फका उम्मेदवारको टुंगो लगाएको छ। कोइरालाको सम्पर्क कार्यालय बालुवाटारमा बसेको बैठकले १० जिल्लामध्ये ८ जिल्लामा आफ्नो समूहको एकल उमेदवार खडा गर्ने निर्णय गरेको छ। यो समूहले बारा र अछाम जिल्लामा अन्य समूहका उम्मेदवारलाई सहयोग गर्ने निर्णय गरेको हो।

उम्मेदवार टुंगो लाग्न बाँकी ६ जिल्लामा पनि आइतबारसम्म टुंगो लाग्ने बताइएको छ।  शुक्रबार अबेर सकिएको छलफलमा मिनेन्द्र रिजाल, चन्द्र भण्डारी, गुरुराज घिमिरेलगायतका नेता सहभागी थिए।

शेखर समूहका एक नेताका अनुसार सप्तरीमा रामदेव साह, सिराहमा रामसुन्दर चौधरी धनुषामा दिनेश प्रसौला, सर्लाहीमा लक्ष्मण राय, मकवानपुरमा जयराम लामिछाने, बाँकेमा नारायण पौडेल, सिन्धुपाल्चोकमा वंशलाल तामाङ, नवलपुरमा महेन्द्रध्वज जिसीलाई सभापतिको उम्मेदवार बनाउने भएको निर्णय भएको हो।अछाम र बारामा भने अरु समूहका उम्मेदवारलाई सहयोग गर्ने बताइएको छ।