राष्ट्रियसभा निर्वाचन : कोरोना संक्रमितले पनि मतदान गर्न पाउने

काठमाडौं – कोरोना सङ्क्रमितले पनि राष्ट्रियसभा चुनावमा मतदान गर्न पाउने भएका छन् । आज (बुधबार) निर्वाचन आयोगले १९ बुँदे मापदण्ड स्वीकृत गर्दै कोरोना सङ्क्रमितले पनि भोट हाल्न पाउने गरी व्यवस्था गरेको हो ।

‘कोरोना सङ्क्रमित भएको भए पनि ऊबाट अर्को व्यक्तिलाई नसर्ने गरी भोट हाल्न पाउने व्यवस्था मिलाउने भन्ने भएको छ’ आयोगका सहायक प्रवक्ता कोमलप्रसाद धमलाले भने। धमलाका अनुसार सङ्क्रमित भएकाहरुलाई भोट हाल्न मतदान केन्द्रमा छुट्टै बाकसको व्यवस्था गरिनेछ ।

१९ सदस्यका लागि यही माघ १२ गते राष्ट्रियसभाको निर्वाचन हुँदै छ । राष्ट्रिय सभामा प्रदेश सदस्य र स्थानीय तहका प्रमुख र उपप्रमुख मतदाता रहन्छन् । निर्वाचन आयोगले ७ वटै प्रदेशको प्रदेश राजधानीमा चुनाव हुने गरी मतदान केन्द्र राखेको छ ।

१९ बुँदे मापदण्डमा आयोगले स्वास्थ्य सतर्कताका विषयहरु समावेश गरेको छ । आयोगका अनुसार प्रत्येक मतदान केन्द्रमा स्वास्थ्यकर्मीको टोली खटिनेछ । र मतदान केन्द्रमा प्रवेश गर्ने सबैको ज्वरो जाँच गर्ने व्यवस्था मिलाइनेछ ।