मोरङ कांग्रेस जिल्ला सभापतिमा लिम्बु
कागजपत्र |
विराटनगर – मोरङ कांग्रेस सभापतिमा डिगबहादुर लिम्बू पुनः निर्वाचित भएका छन् । मंगलबार भएको दोस्रो पटकको निर्वाचनमा सभापति शेरबहादुर देउवा पक्षका उम्मेद्वार दिलीप गच्छदारलाई पराजित गर्दै लिम्बू दोस्रो कार्यकालका लागि सभापतिमा निर्वाचित भएका हुन् ।
आइतबार भएको निर्वाचनमा तीन उम्मेद्वारमध्ये कसैले पनि ५१ प्रतिशत मत नल्याएपछि मंगलबार निर्वाचन भएको थियो । निर्वाचनमा तीन हजार ३६० मत खसेको थियो । लिम्बूले एक हजार ९०६ मत प्राप्त गर्दै विजयी भए । गच्छदारले एक हजार ४२२ मत प्राप्त गरे।
१३औं अधिवेशनमा देउवा पक्षमा रहेर मोरङ सभापतिमा निर्वाचित भएका लिम्बू १४औं महाधिवेशनमा डाक्टर शेखर कोइराला पक्षबाट निर्वाचन लडेका हुन् ।
आइतबार सम्पन्न भएको निर्वाचनमा तीन हजार ४१३ मत खसेको थियो । पहिलो निर्वाचनमा लिम्बूले एक हजार ५४४ मत पाएका थिए । गच्छदारले एक हजार १६६ मत र यदुकुमार विष्टले ५६३ मत पाएका थिए ।
