प्रहरी जवानले आफ्नै साथीहरुमाथि गोली चलाए, चारजनाको मृत्यु

काठमाडौं – भारतको छत्तीसगढको सुकमा केन्द्रीय रिजर्भ पुलिस फोर्स (सीआरपीएफ) का एक जवानले गोली चलाएका छन्। आइतबार राति गोली चलाउँदा चार जना जवानको मृत्यु भएको छ भने ३ जना घाइते रहेका छन्।

रितेश रञ्जन नाम गरेका जवानले आफ्ना साथीहरूमाथि एके–४७ ले फायरिङ गरेको भारतीय प्रहरीले जनाएको छ। घटनामा दुई जनाको अवस्था गम्भीर रहेको बताइएको छ।

गम्भीर घाइतेहरूलाई उपचारको लागि हेलिकप्टरको माध्यमबाट रायपुर लगिएको छ। घटनापछि आरोपित जवान रितेश रञ्जनलाई हिरासतमा राखिएको छ। हालसम्म उनले किन गोली चलाए भन्ने खुल्न सकेको छैन।

यो घटना कोटा विकासखण्डको ग्राम लिंगनपल्लीस्थित २१७ बटालियन क्याम्पमा भएको थियो। बिहानको ३ बजेको समयमा गोली चलेपछि क्याम्पमा भागदौड मच्चिएको थियो। यो क्याम्पमा ८५ औँ बटालियन जवानको पनि क्याम्प रहेको छ।

बदलाको भावना वा मानसिक सन्तुलन बिग्रेको कारणले यो घटना भएको हुनसक्ने भारतीय प्रहरीको अनुमान छ। एक दिनअघि मात्र आरोपितको उनको साथीहरूसँग विवाद भएको थियो।