अनेरास्ववीयू विद्यार्थी नेता शाही पक्राउको विरोध, तत्काल रिहा गर्न माग

काठमाडौं – प्रमुख प्रतिपक्ष दल नेकपा एमालेको भातृ संगठन अखिल नेपाल राष्ट्रिय स्वतन्त्र विद्यार्थी युनियनका विद्यार्थी नेता निराजन शाहीलाई प्रहरीले पक्राउ गरेको विरोधमा अनेरास्ववीयूले विरोध गरेको छ। शाहीलाई तत्काल रिहा गर्न सरकारसँग माग गरेको छ।

अनेरास्ववीयूले आज एक विज्ञप्तिमार्फत विद्यार्थी नेता शाही पक्राउ गरिएको भन्दै घटनाको निन्दा गर्नाका साथै उनलाई तुरुन्त रिहाइ गर्न आग्रह गरेको हो। रिहा नभए आन्दोलन चर्काउने चेतावानी समेत दिएको छ।

बिहीबार केपी शर्मा ओलीको विरोधमा फेसबुकमा किन लेखेको भन्दै नेपाल विद्यार्थी संघका नेता बलराम उप्रेतीसँग शाहीको सामान्य विवाद भएको थियो। विवादकै क्रममा शाही र उप्रेतीबीच हात हालाहालको अवस्था भयो।

सोही क्रममा उप्रेती घाइते भए। तत्कालै घटनास्थल पुगेको प्रहरीले शाहीलाई पक्राउ गरेको थियो।

सत्ताको आडमा प्रहरीसँग मिलि झुटो मुद्दा चलाई शाहीलाई फसाउने षड्यन्त्र चालिएको अनरास्ववीयूले जनाएको छ। खोप वितरण गर्ने सन्दर्भमा स्वयंमसेवकको रुपमा काम गरिरहेको अवस्थामा शाहीमाथि नेविसंघका कार्यकर्ताले आक्रमण गरेको अनरास्ववीयूको दाबी छ।

आफ्ना विद्यार्थी नेता शाहीलाई विनाशर्त रिहाइ गर्न माग गर्दै अनेरास्ववीयूले अमृत साइन्स कलेज अगाडि नाराजुलुस गर्दै प्रहरीविरुद्ध खनिएको हो। ‘प्रहरी प्रशासन मुर्दावाद’ भन्दै सयौंको संख्यामा अनेरास्ववीयूका नेता कार्यकर्ता सडकमा उत्रिएपछि केहीसयम बाटो नै बन्द भएको छ।