जसपामा यादव पक्षको संसदीय दलमा बहुमत पुग्यो

काठमाडौं – जनता समाजवादी पार्टी (जसपा) को उपेन्द्र यादव पक्षले प्रधानमन्त्री शेरबहादुर देउवालाई समर्थन गर्ने भएको छ। आइतबार बसेको यादव पक्षको संसदीय दलको बैठकले देउवालाई समर्थन गर्ने निर्णय गरेको हो।

यादव पक्षको संसदीय दलको बैठकमा २० जना जसपा सांसद सहभागी भएका थिए। यससँगै जसपाको संसदीय दलमा ३२ जनामध्ये २० जना सांसदले उपस्थिति जनाएपछि यादव पक्षको संसदीय दलमा बहुमत पुगेको छ।

आइतबार बसेको यादव पक्षको संसदीय दलको बैठकमा २० जना सांसदले देउवालाई विश्वासको मत दिने निर्णय भएको जसपाका नेता इस्तियाक राईले जानकारी दिए।

यसअघि केपी ओली नेतृत्वको सरकारमा केही साता मन्त्री बनेका राजकिशोर यादव, रेनुका गुरुङ र चन्द्रकान्त चौधरीले अर्का अध्यक्ष महन्थ ठाकुर समूह छाडेका हुन्। राजकिशोर ओली सरकारमा मन्त्री थिए भने रेनुका राज्य मन्त्री भएकी थिइन्।

जसपाको आधिकारिकता विवाद अहिले निर्वाचन आयोगमा चलिरहेको छ। आयोगले आइतबारदेखि सुनुवाइ गर्ने कार्यतालिका छ। आयोगमा सनाखत प्रक्रिया पूरा भएलगत्तै जसपा सरकारमा जाने तयारीमा रहेको नेता राईले बताए।

जसपाबाट अध्यक्ष उपेन्द्र यादवसहित इस्तियाक राई, राजेन्द्र श्रेष्ठ,प्रदिप यादव,रेणु यादव,महेन्द्र यादव र प्रमोद शाह सरकारमा जाने लगभग निश्चित भइसकेको छ।

प्रधानमन्त्री देउवाले अपराह्न ४ बजेपछि प्रतिनिधिसभामा विश्वासको मत लिँदैछन्। देउवालाई नेपाली कांग्रेस, माओवादी केन्द्र, जसपा यादव पक्ष र एमालेको माधव नेपाल पक्षले विश्वासको मत दिने निर्णय गरेका छन्।