मन्त्रीहरुको नाम टुंगो लगाउन माओवादी केन्द्रको स्थायी कमिटी बैठक बस्दै
कागजपत्र |
काठमाडौं – नेकपा माओवादी केन्द्रको स्थायी कमिटी बैठक बस्दैछ। नेपाली कांग्रेस सभापति शेरबहादुर देउवाको नेतृत्वमा गठन हुने सरकारमा जाने मन्त्रीहरुको नाम टुंगो लगाउन बैठक बस्न लागेको हो।
सर्वोच्च अदालतको फैसलासँगै देउवा आज पाँचौपटक प्रधानमन्त्री बन्दैछन्। उनले आज माओवादी केन्द्रलाई सहभागी गराएर सानो मन्त्रिपरिषद् आजै विस्तारको तयारी गरेका छन्।
त्यसका लागि माओवादी केन्द्रको बैठक पार्टीको केन्द्रीय कार्यालय पेरिसडाँडामा बस्दैछ। माओवादीका तर्फबाट मन्त्री छान्ने जिम्मा पार्टीले अध्यक्ष पुष्पकमल दाहाल ‘प्रचण्ड’ लाई दिएको छ।
सम्भवतः माओवादी केन्द्रबाट जनार्दन शर्मा ‘प्रभाकर’, देवबहादुर गुरुङ, पम्फा भुसाल मन्त्री बन्नेछन्। त्यस्तै नारायणकाजी श्रेष्ठ, कृष्णबहादुर महरा, वर्षमान पुन, शक्ति बस्नेतहरु पनि मन्त्रीको लागि लबिङ गरिरहेका छन्।
