एमाले एकता ‘क्षीण’ हुने मोडमा, यस्तो थियो दोस्रो पुस्तका नेतालाई माधव नेपालको जवाफ

काठमाडौं– एमाले एकता क्षीण हुने मोडमा पुगेको छ। अदालतमा विचाराधिन रहेको मुद्दाबाट हस्ताक्षर फिर्ता लिने विषयमा नेता माधवकुमार नेपालले इन्कार गरेपछि एमालेको एकता भत्किने अवस्थामा पुगेको हो।

आइतबार दोस्रो पुस्ताका प्रधानमन्त्री केपी शर्मा ओली पक्षका नेताहरु पनि नेता नेपाललाई मनाउनका लागि कोटेश्वरस्थित निवास पुगेका थिए। तर, उनले भिम रावलको नेतृत्वमा रहेको कार्यदल सक्रिय बनाउने सर्त मात्र अघि सारेनन्, कांग्रेस सभापति शेरबहादुर देउवालाई प्रधानमन्त्री बनाउनका लागि गरेका हस्ताक्षर पनि फिर्ता नलिने अडान राखेको स्रोतले जनायो।

प्रधानमन्त्री ओलीले नेता नेपालसँग संवाद गर्न चाहेको र समस्या समाधानका निम्ति दुई नेता वार्तामा बस्न कोटेश्वर पुगेका दोस्रो पुस्ताका नेताले अनुरोध गरेका थिए। नेता नेपालले उक्त विषयलाई पनि गम्भिरताका साथ लिएनन्।

ओली पक्षका उपमहासचिव विष्णु पौडेल, संसदीय दलका उपनेता सुवास नेम्वाङ, लुम्बिनी प्रदेशका मुख्यमन्त्री शंकर पोखरेलसहित नेता नेपाल पक्षका मानिने सुरेन्द्र पाण्डे, घनश्याम भुसाल, भीम आचार्य र गोकर्ण विष्ट कोटेश्वर पुगेका थिए।

दोस्रो तहका नेताको चरणबद्ध बैठकबाट समाधान निकाल्ने प्रयत्न भएको थियो। तर, नेता नेपालले उक्त विषयलाई पनि खासै चासोका साथ लिएनन्। ‘साथीहरुसँग सल्लाह गरेर कुरा गरौंला’ भन्ने जवाफ फर्काएको स्रोतले जनाएको छ।

नेता नेपाल पक्षलाई देउवाका लागि दिएको हस्ताक्षर फिर्ता लिन सोमबार साँझसम्मको समयसीमा तोकिएको छ। एमाले केन्द्रीय कमिटीको बैठकले नै उक्त निर्णय गरेको थियो। तर, नेता नेपालले भने त्यसलाई आधिकारिकता नमान्ने अड्डी कसेका छन्।