सुजाता निवासमा रामचन्द्र पौडेल र कृष्ण सिटाैलाको अर्थपूर्ण भेट !

काठमाडौं – नेपाली काँग्रेसका बरिष्ठ नेता रामचन्द्र पौडेल, कृष्ण सिटौला र सुजाता कोइरालाबीच सोमबार छलफल भएको छ। उनीहरुबीच १४ औं महाधिवेशनको तयारीको विषयमा छलफल भएको स्रोतले बतायो।

नेपाली कांग्रेसको आसन्न महाधिवेशनमा तीनै जनाले सभापतिमा दाबी गरिरहेका बेला उनीहरु तीनजना नेताको भेटलाई अर्थपूण रुपमा हेरिएको छ। आगामी भदौ १६ गतेदेखि १९ गतेसम्म काँग्रेसको महाधिवेशनको मिति तोकिएको छ।

जबकी सिटौला र पौडेल दुवैजना आ–आफ्नो गुटको नेतृत्व गरिरहेका छन्। यता पछिल्लो समय कोइराला परिवारको समेत आफ्नै छुट्टै गुट छ।

मण्डिखाटारस्थित कोइराला निवासमा भएको भेटमा बरिष्ठ नेता पौडेलले भने देउवाइतरबाट आफू सभापतिको उम्मेदवार बन्ने भन्दै सघाउन आग्रह गरेका थिए। गत शुक्रवार मात्र पौडेलले आफूपक्षीय भेला गरेर सभापतिमा उठ्ने बताएका थिए।

त्यस्तै भेटमा सुजताले गिरिजाप्रसाद कोइरालाले शान्ति प्रक्रिया शुरू गर्दाका सहयात्री भएकाले तीनजना मिलेर जान प्रस्ताव गरेकी थिइन्। उनले कांग्रेसको नेतृत्व लिन सभापतिमा उठ्ने दाबी गरेकी स्रोतले बतायो।

त्यस्तै १३ औं महाधिवेशनमा टीम बनाएर पहिलो चरणमा सभापतिमा उठेका सिटौला पुनः सभापतिमा उठ्ने विचारमा छन्। स्रोतका अनुसार भेटमा सिटौलाले समापतिमा दावी गर्ने बताएका छन्।

यता कोइराला परिवारबाट डा. शेखर कोइरालाले सभापतिमा उम्मेदवारी दिने पक्का जस्तै भएको छ। महामन्त्री डा. शशांक कोइरालाले पनि विमलेन्द्र निधि र प्रकाशमान सिंहसँग छलफल चलाइरहेका छन्।