सरकारविरुद्ध विपक्षी सडकमा, पाँच विद्यार्थी संगठन आजैदेखि संघर्ष सुरु गर्दै
कागजपत्र |
काठमाडौं — विपक्षी पाँच दलको गठबन्धनको निर्णयअनुसार आजदेखि सरकारविरुद्ध सडक संघर्ष सुरु हुँदैछ ।
मुख विपक्षी दल नेपाली कांग्रेसका सभापति शेरबहादुर देउवाको निवासमा बुधबार बसेको विपक्षी गठबन्धनको बैठकले सरकारका हरेक कदमप्रति विरोध गर्दै सडक संघर्ष गर्ने निर्णय गरेको हो ।
सोही निर्णयअनुसार पाँचै दलका भातृ संगठनहरुले एक विज्ञप्ति जारी गर्दै (बिहीबार) आजैदेखि संघर्ष सुरु गर्ने घोषणा गरेका छन् ।
सडक संघर्षका लागि कांग्रेस महामन्त्री पूर्णबहादुर खड्का, नेकपा एमालेका नेता भीम रावल, नेकपा माओवादी केन्द्रका नेता देव गुरूङ र जनता समाजवादी पार्टीका नेता राजेन्द्र श्रेष्ठ रहेको कार्यदल समेत तय भएको छ ।
विद्यार्थी संगठनको आज विरोध प्रदर्शन
विपक्षी गठबन्धनका पाँच विद्यार्थी संगठन आज सरकारविरूद्ध प्रदर्शनमा उत्रदैछन् ।
नेविसंघ, अखिल क्रान्तिकारी, अनेरास्ववियु, समाजवादी विद्यार्थी युनियन र अखिल छैटौंले दिउँसो ३ बजे काठमाडौंको भृकुटीमण्डपमा सरकारविरुद्ध प्रदर्शन गर्न लागेका हुन् ।
सरकारले जनतालाई राहत दिनुको सट्टा कुशासन, महँगी र भ्रष्टाचार गरेर निराश बनाएकाले विरोध प्रदर्शनमा उत्रिन लागेको उनीहरूले जनाएका छन् ।
