प्रधानमन्त्री ओलीको सपथविरुद्धको रिट प्रधानन्यायाधीशको बेन्चमा
कागजपत्र |
काठमाडौं – प्रधानमन्त्री केपी शर्मा ओलीको पद तथा गोपनीयताको सपथ बदर हुनुपर्ने माग गर्दै सर्वोच्च अदालतमा परेको रिटमा आज सुनुवाई हुँदैछ। प्रधानन्यायाधीश चोलेन्द्र शम्शेर जबराले आफ्नो एकल इजलासमा सो मुद्दाको सुनुवाई गर्ने भएका छन् ।
सोमबार बरिष्ठ अधिवक्ता डा. चन्द्रकान्त ज्ञवाली र अधिवक्ताहरू लोकेन्द्र ओली,नवराज अधिकारी सन्तोष भण्डारी र राजकुमार सुवालले सर्वोच्च अदालतमा सोमबार छुट्टाछुट्टै चार वटा रिट निवेदन दर्ता गरेका थिए।
प्रधानमन्त्री ओलीले वाचन गरेको सपथ राष्ट्रपति विद्यादेवी भण्डारीले वाचन गरेको सपथभन्दा फरक परेको उल्लेख गर्दै दायर गरिएको रिटमा सपथ बदर गराउन माग गरिएको उल्लेख छ।
राष्ट्रपति भण्डारीले सपथ गराउँदा प्रधानमन्त्री ओलीले ‘प्रतिज्ञा गर्छु’ भन्ने शब्दावलीलाई त्यो पर्दैन भनेर वाचन गरेका थिए। त्यसले राष्ट्रपतिजस्तो सर्वोच्च संस्थाको मानमर्दन भएको रिट निवेदनकर्ताको ठहर छ।
रिट निवेदनमा निवेदकहरुले प्रधानमन्त्री ओलीले लिएको सपथमा उच्चारण नै नगर्नु गैरसंवैधानिक भएको र आफु अनुकुल शव्दहरु प्रयोग गर्न नमिल्ने उल्लेख छ।
निवेदकहरुले दोस्रोपटक मन्त्री नियुक्त गरिएका मणिचन्द्र थापा, दावा लामा, टोपबहादुर रायमाझी, लेखराज भट्ट, प्रभु शाह, गौरीशंकर चौधरी र रामबहादुर थापा ‘बादल’को नियुक्ती पनि बदर गर्न माग गरेका छन्।
