भलिबलकी राष्ट्रिय खेलाडी पुनम चन्द प्रहरीको सम्पर्कबिहीन सूचीमा

काठमाडौं – प्रहरी प्रधान कार्यालयले नेपाली भलिबलकी राष्ट्रिय खेलाडीसमेत रहेकी पुनम चन्दसहित ११ जनालाई सात दिनभित्र कार्यालयमा सम्पर्क गर्नका लागि सूचित गरेको छ ।

प्रहरी प्रधान कार्यालयले एक सूचना प्रकाशित गर्दै तीनजना प्रहरी सहायक हवल्दारसहित ११ जना प्रहरी कर्मचारीलाई एक साताभित्र सम्पर्कमा आउन प्रहरी प्रधान कार्यालयले आग्रह गरेको हो ।

लामोसमयदेखि सम्पर्कबिहीन रहेका ११ जना प्रहरीहरु गैर हाजिर भएको भन्दै हेडक्वार्टरले सम्पर्कमा आउन सूचित गर्दै यदि सूचनालाई बेवास्ता गरेर सम्पर्कमा नआए सेवाबाट हटाउने चेतावनी दिएको छ ।

प्रहरीको निकालेको सूचनामा सम्पर्कबिहीन नेपाली राष्ट्रिय भलिबल टिमकी महत्वपूर्ण सदस्य रहेकी पुनम चन्द पनि परेकी छिन् । उनी केही महिनाअघि नै अस्ट्रेलिया पुगिसकेकी छिन् । नेपाली राष्ट्रिय भलिबल टिमका अधिकांश सदस्यहरु अस्ट्रेलिया जाने क्रम चलिरहेको बेला पछिल्लो पटक उनी अस्ट्रेलिया पुगेकी हुन् ।

अन्य केही विभागका खेलाडीहरुले राजीनामा दिएर अस्ट्रेलिया गए पनि पुनम भने बिना जानकारी अस्ट्रेलिया पुगेको यतिबेला खुलेको छ । प्रहरीको शारिरीक सुगठन तथा खेलकुद शिक्षालयमा दरबन्दी रहेकी कञ्चनपुर भिमदत्त–६ की पुनम २०८२ को चैत १५ गतेदेखि सम्पर्कबिहीन रहेको भन्दै हेडक्वार्टरले ७ दिने सूचना जारी गरेको हो ।

पुनम पछिल्लोपटक अस्ट्रेलियास्थित म्याग्दी ओभरसिज नेप्लीज एशोसिएसनको एक प्रतियोगितामा सहभागी भएको खुलेको थियो ।

पुनम अस्ट्रेलिया पुगेर क्लब भलिबल खेल्न थालिसकेको केही महिना बितिसकेको छ, यता नेपाल प्रहरीले भने ७ दिने सूचना प्रकाशित गरेको छ ।

यतिबेला नेपालमा महिला भलिबलको काभा च्याम्पियनसिप चलिरहेको छ । नेपाल सेमिफाइनल प्रवेश गरिसकेको अवस्था छ । नेपालले अघिल्ला काभामा सहभागी केही प्रमुख खेलाडीहरु बिना प्रतिस्पर्धा गरिरहेको छ । नेपाली भलिबलमा खेलाडी पलायन हुने क्रम दिनदिनै बढिरहेको अवस्थामा पुनम पनि पलायन भएकी छिन् । उनीबाहेक राष्ट्रिय भलिबल टिमकी पूर्वकप्तान अरुणा शाही, खेलाडीहरु, सरस्वती चौधरी, कविता भट्ट, पुरुष भलिबलका मानबहादुर श्रेष्ठलगायत कैंयौं खेलाडीहरु विदेशीइरहेका छन् ।

प्रहरी प्रधान कार्यालयले पछिल्लोपटक प्रकाशन गरेको सम्पर्कविहीन सूचीमा रामसकल रावल, ओमबहादुर चौधरी थारु, नरजंग वली, पुनम चन्द, हरी भुल, केशर कुँवर, सन्दीप कार्की, नविन कोइराला, राहुलकुमार साहु, राजकुमार गुरुङ र विशाल कुँवर रहेका छन् ।