ज्युँदो मान्छेको मृत्युदर्ता प्रमाणपत्र बनाएको आरोपमा वडाध्यक्षसहित ४ जना पक्राउ

पश्चिम नवलपरासी-  जीवित व्यक्तिलाई ‘मृत’ बनाउने अनौठो र गम्भीर प्रकरणमा पश्चिम नवलपरासीको सुस्ता गाउँपालिका–५ बाट वडाअध्यक्षसहित चार जना पक्राउ परेका छन् ।

पक्राउ पर्नेमा वडाअध्यक्ष प्रभुनाथ अहिर, वडासचिव सञ्जय कुमार चौधरी, स्थानीय तारिक मिया अन्सारी र छोटे खाँ रहेका छन् । उनीहरूले मिलेमतोमा झुटो विवरण पेश गर्दै जिउँदो व्यक्तिको मृत्युदर्ता तयार गरेको आरोप लागेको छ ।

जिल्ला प्रहरी कार्यालय नवलपरासीका सूचना अधिकारी विरदत्त पन्तका अनुसार उक्त कार्य राष्ट्रिय परिचय पत्र तथा पञ्जिकरण ऐन, २०७६ विपरीत भएको ठहर गर्दै अनुसन्धान अघि बढाइएको छ । ऐनको परिच्छेद ६ को दफा ४१ (ग) र (च) अन्तर्गत झुट्टा विवरण पेश गरी मृत्युदर्ता प्रमाणपत्र बनाउने कसुरमा उनीहरूलाई पक्राउ गरिएको उनले जानकारी दिए ।

अहिले पक्राउ परेकाहरूलाई इलाका प्रहरी कार्यालय बेलाटारीको थुनुवा कक्षमा राखेर थप अनुसन्धान भइरहेको प्रहरीले जनाएको छ ।