रवि लामिछानेलाई धरौटीमा छाड्ने आदेश उच्च अदालतद्वारा सदर

काठमाडौं– राष्ट्रिय स्वतन्त्र पार्टी (रास्वपा) का सभापति रवि लामिछानेसँग सम्बन्धित स्वर्णलक्ष्मी सहकारी ठगी प्रकरणमा उच्च अदालत पाटनले काठमाडौं जिल्ला अदालतको धरौटी आदेश सदर गरेको छ।

बिहीबार न्यायाधीश खडानन्द तिवारी र दीपककुमार खरेलको इजलासले जिल्ला अदालतले मागेको ६० लाख रुपैयाँ धरौटीलाई बदल्न नपर्ने निर्णय गरेको हो।

उच्च सरकारी वकिलको कार्यालयले रवि लामिछानेसहित छविलाल जोशी, सुनिता नेवा र कमल लामा विरुद्ध धरौटी आदेश बदर गरी उनीहरूलाई पुर्पक्षका लागि थुनामा राख्न माग गरेको थियो। तर अदालतले प्रतिवादीहरूको बयान, रकमको प्रयोग अवस्था र संलग्नता विचार गरी, पहिलेको जिल्ला अदालतको धरौटी आदेश कायम रहने निर्णय गरेको हो।

अदालतको आदेशमा उल्लेख छ कि, “प्रतिवादीहरूले माग गरेको धरौटी दाखिल गरी प्रतिवादीहरूमा जाँच र थप प्रमाण हेर्दै जाने क्रममा, पूर्व निर्णयमा परिवर्तन आवश्यक देखिएको छैन।”

जिल्ला अदालत काठमाडौंले माघ २ गते रविसँग ६० लाख, र माघ ७ गते पूर्व डिआइजी जोशीसँग ५० लाख धरौटी मागेको थियो।