कोरियन भाषा परीक्षाको तालिका सार्वजनिक

काठमाडौं-  कोरियाली भाषा परीक्षाको तालिका सार्वजनिक भएको छ। ईपीएस कोरिया शाखाले मंसिर १ गतेदेखि परीक्षा सुरु हुने जानकारी दिएको हो। पहिलो चरणमा उत्पादनमूलक क्षेत्रमा परीक्षा सञ्चालन गरिनेछ।

रोजगार अनुमति प्रणाली (ईपीएस)अन्तर्गत कोरियन भाषा परीक्षाका लागि यस वर्ष एक लाख २ हजार ५६४ जनाले आवेदन दिएका छन्। यो वर्ष करिब ५ हजार ३०० जनाले परीक्षा उत्तीर्ण गर्ने अनुमान गरिएको छ, जसमध्ये उत्पादन क्षेत्रतर्फ ३ हजार ५०० र कृषि तथा पशुपालनतर्फ १ हजार ८०० जनाले उत्तीर्ण हुने अपेक्षा गरिएको शाखाले जनाएको छ। यद्यपि कोरियामा कामदारको मागअनुसार उत्तीर्ण संख्या घटबढ हुन सक्ने पनि भनिएको छ।

एक दिनमा बढीमा पाँच सिफ्टमा परीक्षा सञ्चालन गरिनेछ।